Rınat Zaıyt vıtse-premerden mádenıet salasyndaǵy «qara tizim» máselesin sheshýge kómek surady

ASTANA. KAZINFORM — Májilistiń jalpy otyrysynda depýtat Rınat Zaıyt Premer-mınıstrdiń orynbasary Ermek Kósherbaevtan mádenıet salasyndaǵy «qara tizim» máselesin sheshýge kómek surady. 

Rınat Zaıyt saýalyn anımatsııa salasyndaǵy problemadan bastaǵan.

— Qazaqstandaǵy faktige kelsek, «Qazaqfılm men „Qazaq anımatsııasy“ birlestigi 5 jylda 1,4 mlrd teńgege 47 anımatsııalyq fılm jasady degen esep bar. Mundaı qarjylandyrýdan keıin nege serpilis bolǵan fılmniń tórteýi ǵana telearnalardan kórsetildi. Qalǵany efırge de, ekranǵa da, eshqaıda shyqqan joq. Kazakh Animation deıtin 475 oqyrmany bar arnasy bar. Soǵan 12 mýltfılm qoıylǵan. Eń kóp qaralym jınaǵan bireýi ǵana — 44 myń. Bul endi qıyn jaǵdaı ǵoı. Qazirgi marketıngtiń, tsıfrlandyrýdyń zamanynda biz nege artta qalyp qalyp jatyrmyz? Aqsha bar, aýdıtorııa túsirgen ónimder nege jetpeıdi? Anımatsııaǵa bólingen aqsha nege ilgerileýge jol ashpaı otyr, — dedi ol.

Sondaı-aq, depýtat mádenıet alasynda «qara tizim» degen jaǵymsyz tendentsııa qaıtadan beleń alyp kele jatqanyn málimdedi.

— Ermek Bedelbaıuly, bizdiń qoǵamda «qara tizim» degen bále bar. Men ózim de birneshe ret bolǵanmyn onda. Qazir de sonyń áńgimesi shyǵyp jatyr. Osy «qara tizim» boıynsha kómektesýge qalaı qaraısyz, — dedi Rınat Zaıyt.

Mádenıet jáne aqparat mınıstri Aıda Balaeva anımatsııa salasyndaǵy máselelerdiń oryndy kóterilip otyrǵanyn aıtty.

— Biz bul máselemen eki jyldan beri aınalysyp kelemiz. Shynyn aıtý kerek, birinshi kezekte ónim joq boldy. Ekinshiden, siz aıtqan 47 ónimdi buqara halyqqa kórsetý úshin quqyqtyq negiz joq boldy. Halyqaralyq shart boıynsha ondaı ónimder ár túrli deńgeıdegi halyqaralyq festıvaldiń sheńberinde baıqaýlardan ótýi kerek. Sondyqtan bul jumys istelip jatyr. Sonyń ishinde 47 ónimniń jartysy halyqaralyq baıqaýdan ótti. Basqalary festıvalderge qatystyrylyp jatyr. Ózińiz aıtyp otyrǵan bul máselede arnaıy marketıng, strımıng júıelerde taratý júıesi bolǵan joq. Ony biz 2024 jyldan bastap qolǵa aldyq. Qazir jańa anımatsııalyq ónimderdiń 25-i «Qazaqstan» ulttyq arnasynda, 69-y «Habar» telearnasynda ornatyldy, — dedi ol.

Al Ermek Kósherbaev «qara tizim» máselesin aınalyp ótip jaýap berdi.

— Bul óte mańyzdy suraq. Sebebi ulttyq ıdeologııamyzǵa jatady. Keler urpaq qaı tilde sóıleıdi, qaı ulttyń músheleri bolady, óte mańyzdy. Aıtylǵan syn óte oryndy. Iá, osyndaı aqshamen bul sala damýy kerek edi. Sońǵy kezde kınematografııa, anımatsııa salalarynda birtalaı ózgeris engizilip jatyr. Bul jerde taǵy kásiptik máseleler óte mańyzdy. Jaqyn arada bul máseleni qozǵaltamyz dep oılap otyrmyn, — dedi vıtse-premer.

Buǵan deıin Mádenıet jáne aqparat mınıstri Aıda Balaeva Úkimet otyrysynan keıin ótken baspasóz máslıhatynda «Qazaqfılm» men «Qazaqanımatsııa» mekemeleriniń tóńiregindegi daýǵa pikir bildirgen edi.