Rınat Zaıyt Ulttyq áskerı-patrıottyq ortalyqtyń basshysy bolyp taǵaıyndaldy
ASTANA.KAZINFORM – Burynǵy Májilis depýtaty Rınat Zaıyt Qazaqstan Respýblıkasy Qarýly Kúshteri Ulttyq áskerı-patrıottyq ortalyǵynyń basshysy qyzmetine taǵaıyndaldy. Bul týraly Rınat Zaıyt Adal ADAM YouTube arnasyna bergen suhbatynda málimdedi.
Rınat Zaıyttyń sózinshe, depýtattyq mandatyn tapsyrǵannan keıin ol bir-eki aı demalyp, jańa jumysqa kirisýge daıyndalǵan.
– Shilde aıynan beri, mandatymdy tapsyrǵannan keıin, shynymdy aıtsam, bir-eki aı demaldym. Sebebi úsh jyl úsh aı men úshin aýyr kezeń boldy. Buǵan deıin de osydan keıin bundaı jumysqa jolamaýǵa tyrysatynymdy aıtyp júrdim. Sebebi, jaýapkershiligi joǵary jumysta atqarǵan eńbegiń elenbeı qalsa, adamnyń kóńiline qaıaý salady. Ýaqyt óte kele jumysqa degen qulshynys ta álsireı bastaıdy, – dedi ol.
Onyń aıtýynsha, qazan aıynyń basynda jańa Qorǵanys mınıstrliginiń shaqyrtýymen Ulttyq áskerı-patrıottyq ortalyqtyń jumysyna qosylǵan.
– Qorǵanys mınıstrligine qarasty Ulttyq áskerı-patrıottyq ortalyq degen ujym bar. Onyń quramynda ansambl men orkestr jumys isteıdi. Sonymen qatar ortalyq patrıottyq is-sharalar men mádenı jumystardy uıymdastyrady. Áskerdiń jáne áskerge deıingi jastardyń boıynda patrıottyq qalpy, olardyń Otan aldyndaǵy otansúıgishtigin arttyrýyn qadaǵalaıtyn birden bir ortalyq. Men osy ortalyqqa keldim, – dedi Rınat Zaıyt.
Sondaı-aq ol Memleket basshysy Qasym-Jomart Toqaevtyń qorǵanys salasyn reformalaý jónindegi tapsyrmalary jańa ózgeristerge jol ashqanyn atap ótti.
– Qazirgi jaǵdaıdy eskere otyryp, Memleket basshysy Qasym-Jomart Kemeluly Toqaevtyń túbegeıli qorǵanys salasyna jasańdar dep tapsyrǵan reformasy bastaldy. Men jańa ózgeristerge qatysýdy jaqsy kóretin adam retinde bul jumysqa qýana-qýana keldim, – dedi ol.
Aıta keteıik, Asqar Ýmarov Qazaqstan Halyq Keńesi tóraǵasynyń keńesshisi laýazymyna taǵaıyndaldy.
