Rınat Zaıyt et saýdasyndaǵy másele týrasynda: aýylda deldaldar júgirip júr

ASTANA. KAZINFORM — Búgin Májilistiń jalpy otyrysynda depýtat Rınat Zaıyt et saýdasyndaǵy deldaldarmen kúresti kúsheıtýdi surady. 

— Et qymbattady degende, aýyl sharýashylyǵyndaǵy malshylar bir rahattanyp qalady dep oıladyq. Aýylǵa barsaq, ettiń baǵasy eshqandaı qymbattamaǵan. Deldaldar júgirip júr. Bazarda 5-6 myń teńge turatyn etiń aýyl men qystaqta 3 myń teńgege jeter-jetpes shamasynda. Ony bazarǵa aparyp sataıyn dese, onda bir «kóke» otyryp alyp, óziniń tártibin ornatqan, ıaǵnı tańǵy saǵat 4-te ákelseń úlgeresiń. Úlgermeseń — saýda joq. Atap aıtqanda, baǵany qoıatyn osylar. Jármeńkege ákeleıin dese, jaqynda qanshama sharýa: «Astana qalasynda ákimdik oryndardy satyp jibergen» dep shaǵymdandy. Sonymen qatar, eksportqa maldyń terisi men júnin shyǵara almaı otyr. Bul turǵyda deldaldarmen kúresý qalaı iske asady? , — dep surady Rınat Zaıyt.

Óz kezeginde Saýda jáne ıntegratsııa mınıstri Arman Shaqqalıev deldaldarǵa tosqaýyl qoıý baǵytynda qazir júıeli jumys jalǵasyp jatqanyn aıtty.

— Osy jyldyń 8 aıyndaǵy jaǵdaıǵa toqtalsaq, 10 myńǵa jýyq ónimdi jetkizý tizbegine taldaý jasadyq. Bul rette salyq, kóterme saýda, bólshek saýdany qarap jatyrmyz. Negizi, mundaı faktorlar bar. Osyndaı jaǵdaılarǵa 700-den astam ákimshilik is qozǵadyq, — dedi mınıstr.

Eske salsaq, bıyl qyrkúıek aıynda Premer-mınıstrdiń orynbasary — Ulttyq ekonomıka mınıstri Serik Jumanǵarın et baǵasynyń tómen bolýy mal sharýashylyǵynyń damýyna teris áser etkenin aıtty.