Rınat Maltsagov: Karantın talaptary jeńildegen kezde tártipke baǵynýymyz kerek
NUR-SULTAN. QazAqparat - Qazaqstandyq tanymal ánshi karantın sharalaryn kezeń-kezeńimen alýǵa qatysty pikir bildirdi. Ol eń bastysy - tártipke baǵyný kerek ekendigin aıtty, dep habarlaıdy QazAqparat tilshisi.
«Elimizde azamattyq ustanymy durys, jaýapkershiligi mol, únemi maskamen júretin adamdar bar. Jaýapkershilikti sezinýden jalyqqan adamdar da bar. Degenmen, tártipke baǵynyp, qorǵanys quraldaryn qoldanýymyz kerek, sebebi biz ózimiz úshin ǵana emes, aǵa býyn - ata-anamyz úshin de ýaıymdaımyz. Bizdiń aǵzamyz jas, al olar úshin dertpen kúresý qıyn, sol sebepti olarǵa tóngen qaýip te zor», - deıdi ánshi Rınat Maltsagov.
Ol ózimiz ben jaqyndarymyzdy qorǵaý kerek ekenimizdi, ol úshin jaýapkershilikti barynsha sezinýimiz kerek ekenin aıtty.
«Mysaly, Qytaı aýrý aýqymdy túrde tarap ketse de temirdeı tártiptiń arqasynda birneshe apta ishinde qalypqa keltirip aldy. Olar tártipke baǵyndy. Italııalyqtar tártipke baǵynǵysy kelmedi, biraq jaǵdaı ýshyqqan kezde esterin jıyp, olar da tártipke baǵyndy. Demek, bizdii elge de tártip pen jaýapkershilik kerek. Ózimiz úshin ǵana emes, qoǵam úshin de jaýaptymyz. Áleýmettik araqashyqtyqty saqtaýymyz kerek, bul óte mańyzdy», - deıdi ol.
Aıta keteıik, 13 tamyzda QR Premer-Mınıstri Asqar Mamınniń tóraǵalyǵymen ótken memlekettik komıssııa otyrysynda Karantın sharalaryn kezeń-kezeńimen alyp tastaý jospary bekitildi.
