Rımniń jańa Papasyn taqqa otyrǵyzý saltanaty 19 naýryzda ótpek
ASTANA. 14 naýryz. QazAqparat - Rımniń jańa Papasy Frantsısk І-di taqqa otyrǵyzý saltanaty 19 naýryzda ótýi múmkin, dep málimdedi Vatıkannyń jańalyqtar qyzmeti baspasóz hatshysy Federıko Lombardıdiń sózine silteme jasap.
Ol sondaı-aq papa búgin tańerteń kardınaldarmen birge Sıkstın kapellasynda minájat ótkizýi múmkin degen boljam aıtty. 2005 jyly saılanǵan boıda burynǵy papa Benedıkt XVI da óz qyzmetin osylaı bastaǵan bolatyn.
Bul týraly RBK agenttigi habarlady.
Taqqa otyrý messasy kezinde Frantsısk І-ge papa bıliginiń joǵary belgileri - tuńǵysh pontıfık áýlıe Petrdiń buryn balyqshy bolǵanyn eske salatyn balyqshy saqınasy jáne basqa da qajetti rásimder jasalady.
Eske sala keteıik, kardınaldar konklavynda Býenos-Aırestiń arhıepıskopy ıezýıt Horhe Marıo Bergolo saılanyp, Frantsısk degen papa esimine ıe boldy. H.M.Bergolo 1936 jyly 17 jeltoqsanda Býenos-Aıreste ıtalıan emıgranty, temirjol jumysshysynyń otbasynda dúnıege keldi. Ol hımııa tehnıgi dıplomyn aldy, odan keıin Býenos-Aırestegi Vılla Devoto semınarııasynda oqydy. 1958 jyly 11 naýryzda ıezýıtter ordenine kirdi. Budan keıin Býenos-Aırestegi Qasıetti Iosıf kolledjinde bilimin jalǵastyryp, fılosofııa lıtsenzıatyn aldy. H.M.Bergolo - Argentınanyń Katolık ýnıversıtetiniń uly kantsleri.
