Rımge barmaı turyp, jerlesterimniń batasyn alyp ketýge keldim - Súndet Baıǵojın
QOSTANAI. QazAqparat - Tanymal opera ánshisi Súndet Baıǵojın Qostanaı oblysyna kelip, tilshilermen suhbattasty, dep habarlaıdy QazAqparat tilshisi.
Italııaǵa sapar sheger aldynda Súndet Baıǵojın Qostanaı qalasynda «Týǵan jerge taǵzym» atty shyǵarmashylyq keshin ótkizedi.
«Týǵan jerime kelgenime qýanyshtymyn. Bul Qostanaı oblysyndaǵy alǵashqy kontsertim bolmaq. Keshte qazaqtyń halyq ánderimen qosa, ózimniń jeke repertýarymdaǵy arııalar da oryndalady. Ózderińizge belgili, Eýropanyń eń ataqty teatrlardyń birimen ekijyldyq kelisimshartqa otyrdym. Árıne, irikteý sharttary qatań boldy. Mine, Rımge barmaı turyp, jerlesterdiń batasyn alyp ketýge keldim», - dedi opera ánshisi.
Onyń aıtýynsha, Elbasynyń «Rýhanı jańǵyrý» baǵdarlamasyn júzege asyrýǵa árbir qazaqstandyq úlesin qosýy kerek.
«Prezıdentimiz qazaq ónerin álemdik mádenı keńistikke shyǵarý týraly únemi aıtyp keledi. Ataqty barıton Ermek Serkebaevtyń armany Eýropanyń úzdik sahnalarynda Qazaqstan mádenıetin asqaqtatý bolǵan edi. Qazaqtyń osyndaı tulǵasynyń armanyn iske asyrý baqyty maǵan buıyryp tur. Qazaqstandyq opera óneri eshkimnen kem emes ekenin dáleldegim keledi», - deıdi Baıǵojın.
Eske salaıyq, Súndet Baıǵojın - Italııadaǵy Toti dal Monte halyqaralyq baıqaýynyń jáne Arena di Verona qorynyń opera ánshileri saıysynyń jeńimpazy. Ánshi Nıý-Iorktegi (AQSh) Karnegı-Holl, Berlın fılarmonııasy (Germanııa), Parıjdegi Elıseı alańdary teatry (Frantsııa), Vena Kontserthaýs (Avstrııa) syndy álemge tanymal sahanalarda, sonymen qatar Japonııa, Ońtústik Koreıa, Túrkııa, Iordanııa, Túrikmenstan, Reseı, Belarýs jáne t.b. elderde orasan zor jetistikpen óner kórsetken.
