Rımge attanǵaly jatqan qazaq opera ánshisi shymkenttik jastarmen kezdesti
ShYMKENT. QazAqparat - Qazaqstannyń eńbek sińirgen qaıratkeri, «Astana Opera» teatrynyń jetekshi solısi Súndet Baıǵojın Ońtústiktiń jas vokalısterimen kezdesip, óz tájirıbesimen bólisti. Asqaq daýysty ánshi ótken jyly sharttary qatań irikteýden ótip, Eýropanyń eń ataqty teatrlarynyń biri - Rım sahnasynda eki jyl kóleminde óner kórsetýge arnaıy shaqyrtý alǵan bolatyn, dep habarlaıdy QazAqparat tilshisi.
Oblystyq saz kolledjinde ótken kezdesýde opera maıtalmany ulaǵatty ustazdardyń tárbıesi men talabynyń arqasynda, bıik beleske jetkenin aıtty. Teatr ánshisi sońynan ergen izbasarlarǵa ilkimdi jol kórsetý - shynaıy baqyt dep sanaıdy.
«Barlyq úırengenimdi, alǵan tájirıbemdi búgingi jastarǵa jetkizýge tyrysyp otyrmyn. Bolashaq opera ánshilerimen ashyq dıalog júrgizdim. Negizi, opera óneri - óte kúrdeli óner. Ózińiz baıqap qarasańyz, Bıbigúl apamyzdan keıingi Maıra Muhamedqyzy, Nurjamal Pernebekqyzy bolyp jatsa, odan keıingi kele jatqan satynyń arasynda 15 jyldaı bar. Ol óte múshkil jaǵdaı. Ábir óner ordasyn bitirgen shákirt óz jolyn taýyp jatsa, ol vokaldan teatrǵa shyǵyp, án aıta bilýi kerek»,- deıdi ol.
Búginde talantty ánshi keremet daýysymen, eńbekqorlyǵymen Qazaqstandy ǵana emes, ózge elderdi de tánti etip júrgeni ras. Ótken jyldyń sońǵy aılarynda búkil álemdi sharlasa da, týǵan jerinen artyq ystyq jerdi, jyly iltıpatty kórmeıtinin atap ótti. Ánshiniń patrıottyq rýhy, tabandylyǵy, ónerge degen erekshe súıispenshiligi árbir jasqa jarqyn úlgi bolarlyqtaı.
Aıta ketsek, Súndet Baıǵojın - kóptegen mártebeli halyqaralyq baıqaýlardyń laýreaty, sonyń ishinde B.Tólegenova atyndaǵy Halyqaralyq vokalıster baıqaýynyń Bas júldegeri, Italııadaǵy Toti dal Monte (Trevızo q.) halyqaralyq baıqaýynyń jáne Arena di Verona qorynyń opera ánshiler baıqaýynyń jáne t.b. saıystardyń jeńimpazy. Ártis Nıý-Iorktegi (AQSh) Karnegı-Holda, Berlın fılarmonııasynda (Germanııa), Parıjdegi Elıseı alańdary teatrynda (Frantsııa), Vena Kontserthaýsta (Avstrııa) jáne ózge de álemge tanymal sahnalarda, sonymen qatar Japonııa, Ońtústik Koreıa, Túrkııa, Iordanııa, Túrikmenstan, Reseı, Belarýs jáne t.b. elderde orasan zor jetistikpen óner kórsetken.
