Rımdik tsentýrıondar Kolızeıdi jaýlap aldy
ASTANA. 14 sáýir. QazAqparat - Rımdik tsentýrıondar men gladıatorlardyń kıimderin kıgen ıtalıandyqtar Kolızeıdi jaýlap aldy, dep habarlady La Repubblica - Roma.
Bylaıǵy ýaqytta týrıstermen aqshaǵa sýretke túsetin «tsentýrıondar» olardyń arheologııalyq qazba oryndarynan, sonyń ishinde Ejelgi Rımniń kórnekti jerlerinen aýlaqqa ketýin talap etetin zańǵa qarsylyq retinde Flavııa amfıteatrynyń ekinshi qabatyna jaıǵasyp aldy. Buǵan deıin olar sáýirdiń basynda Kolızeıdi «jaýlap» alǵan bolatyn.
«Bizge Kolızeıde jumys jasaýǵa múmkindik berińder, belgili bir erejelerdi ornatyp, bizdiń osynda qalýymyzǵa múmkindik berińder», dep talap etedi qarsylyq aktsııasyna qatysýshylar. La Repubblica-nyń habarlaýynsha, bul kúnderi olar týrıstermen sýretke túskenderi úshin aqsha alyp jatqan joq.
Qarsylyq aktsııasy barysynda polıtsııamen janjaldar da bolyp qaldy, qarsylasýshylardyń birin «jedel járdem» alyp ketýine týra keldi. Bul oqıǵany baqylap turǵan týrıster qol shapalaqtap, «Biz tsentýrıondar jaǵyndamyz!» dep aıqaılady. Aqyrynda polıtsııa qarsylasýshylardy Kolızeıdiń kireberisine tyqsyrdy.
Corriere della Sera basylymynyń jazýynsha, rımdik bılik «tsentýrıondar» úshin birqatar erejeler belgilemek. Atap aıtqanda, olar arnaıy kýálik alýlary tıis, sonymen qatar týrısterden aqsha ala almaıdy jáne olar belgili bir aımaqtarda ǵana jumys jasaı alady, biraq oǵan Kolızeı sııaqty ejelgi rımdik sáýlet eskertkishteri kirmeıdi.
«Bizdi Kolızeıden yǵystyrǵysy keletin zań qajet emes. Rımniń ejelgi sáýlet eskertkishteriniń qasynda tura almaıtyn bolsaq, tsentýrıon bolýdyń qajeti qansha?!», - dedi qarsylyq aktsııasyna qatysýshylardyń ókili Davıde Moskato.
