Rımdegi Kolızeı jumysshy mert bolǵannan keıin ishinara jabyldy
ASTANA. KAZINFORM- Rımdegi Kolızeı 23 qyrkúıekte jumysshynyń qaza tabýyna baılanysty aza tutý belgisi retinde kelýshiler úshin ishinara jabyldy, dep habarlaıdy BELTA.
RomaToday basylymynyń málimetinshe, qaıǵyly oqıǵa 22 qyrkúıekten 23 qyrkúıekke qaraǵan túni bolǵan. 22 jastaǵy jumysshy Andrea Morettı jańa jaryqtandyrý júıesin ornatý jumystary kezinde shamamen 10 metr bıiktikten qulap ketken.
Oqıǵa Kolızeıdiń ekinshi deńgeıinde túngi saǵat 00:30 shamasynda bolǵan.
Oqıǵa ornyna Rım karabınerleriniń Ortalyq bóliminiń qyzmetkerleri, Eńbek ınspektsııasynyń ókilderi jáne jergilikti densaýlyq saqtaý basqarmasynyń mamandary kelgen.
Rım prokýratýrasy óndiristegi jazataıym oqıǵaǵa qatysty tergeý bastady. Abaısyzda adam ólimine ákep soqqan is boıynsha qylmystyq is qozǵaldy. Oqıǵanyń sebepteri anyqtalyp jatyr.
Italııa premer-mınıstri Djordja Melonı jumysshynyń qaza bolýyna baılanysty kóńil aıtty.
Kolızeıdiń jańa biryńǵaı jaryqtandyrý júıesin qazan aıynda iske qosý josparlanǵan bolatyn.
Buǵan deıin Rımniń 2036 nemese 2040 jylǵy Olımpıada oıyndaryn ótkizýge ótinim berýge daıyndalyp jatqany habarlandy.
