Rımde jyldamdyq shekteýi saǵatyna 30 shaqyrymǵa deıin tómendetildi

ASTANA. KAZINFORM — Italııanyń astanasy Rım qalasynyń ortalyǵynda kólik qozǵalysynyń jyldamdyǵy saǵatyna 30 shaqyrymmen shekteldi, dep habarlaıdy Anadoly.

Rım mýnıtsıpalıteti 14 qańtarda resmı túrde jarııalaǵan sheshimge sáıkes, jol qozǵalysy qaýipsizdigin arttyrý maqsatynda qala ortalyǵyndaǵy shekteýli qozǵalys aımaqtarynda (ZTL) jáne myńǵa jýyq kóshede júrgizýshiler úshin jyldamdyqtyń eń joǵarǵy shegi 30 km/saǵ bolyp belgilendi.

Osyǵan baılanysty jol qozǵalysyna jaýapty Rım qalalyq polıtsııasy atalǵan aımaqtarda patrýldeý men baqylaýdy kúsheıtti.

Qalalyq keńestiń kólikke jaýapty múshesi Eýdjenıo Patane bul shara jol-kólik oqıǵalarynyń sany men soǵan baılanysty shyǵyndardy azaıtý úshin qabyldanǵanyn atap ótti.

Onyń aıtýynsha, tártiptiń saqtalýyn baqylaý úshin qalanyń basty kósheleriniń biri — Krıstofor Kolýmb kóshesine jańa jyldamdyq baqylaý kameralary ornatylady.

Sonymen qatar qala boıynsha qaýipsizdigi joǵary 175 jańa jaıaý júrginshi ótkeli salynbaq.

Aıta keteıik, eldiń soltústigindegi Bolonıa qalasynda osyndaı jyldamdyq shekteýi eki jyl buryn engizilgen, oǵan qaramastan ortalyq úkimet bul bastamaǵa qarsy pikir bildirgen edi.

Osyǵan deıin týrıster Rımdegi Trevı sýburqaǵyna jaqyndaý úshin eki eýro tóleýge májbúr bolatynyn jazdyq.