Rımde úısizderge arnalǵan qysqy shatyrlar ornatyldy

ASTANA. KAZINFORM — Rım mýnıtsıpalıteti qystyń qaqaǵan sýyǵynda úısiz-kúısiz adamdar panalaıtyn baspana qurylysyna 4,3 mln eýro bóldi, dep habarlaıdy Euronews.

2024 jyldyń kókteminde Rım qalalyq keńesi qys aılarynda úısizderge baspana retinde qyzmet etetin shatyrlar salýǵa 4,3 mıllıon bólý týraly sheshim qabyldady.

Josparǵa sáıkes, Termını, Tıbýrtına, Ostıense jáne San-Petro stantsııalaryndaǵy tórt shatyr qurylymy 70 adamdy qabyldap, táýlik boıy jumys isteýi kerek. Olardy 2025 jyly Rımniń mereıtoıyna qaraı ashý josparlanǵan bolatyn.

Rımde 22 myńǵa jýyq baspanasyz adam bar, jergilikti bılik baspanalardyń sanyn kóbeıtýge ýáde etkenimen, bul shara muqtajdardyń az ǵana bóligin qamtıdy.

ISTAT málimeti boıynsha 2021 jyly Italııadaǵy 2198 mýnıtsıpalıtette 96 197 úısiz adam bolǵan.

Olardyń jartysy alty mýnıtsıpalıtette turady, eń úlken paıyzy, ıaǵnı 23 paıyzy — Rımde. El astanasynan keıin Mılan (9%), Neapol (7%), Týrın (4,6%), Genýıa (3%) jáne Fodjııa (3,7%).

Eýroparlament laıyqty baspanaǵa qol jetkizý — adamnyń negizgi quqyǵy dep sanaıdy. Osyǵan súıene otyryp, Eýroodaq zań shyǵarýshy organynyń músheleri 2020 jylǵy 24 qarashadaǵy qararynda odaqqa múshe elderden 2030 jylǵa qaraı baspanasyzdyq máselesin sheshýdi talap etti.

Buǵan deıin Italııa elshisi Qazaqstan týraly kitap jazyp jatqany anyqtaldy.