Rımde Túrkııanyń ejelgi jádigerleri qoıylatyn «Troıa jáne Rım» kórmesi ashylady
ASTANA. KAZINFORM – Rımdegi Kolızeı arheologııalyq alańynda 11 maýsymda «Troıa jáne Rım: ejelgi Jerorta teńiziniń mıfteri, ańyzdary jáne tarıhy» atty kórme ashylady. Ekspozıtsııada Túrkııanyń 19 mýzeıinen jetkizilgen 221 jádiger men Troıa atynyń kóshirmesi usynylady, dep habarlaıdy Anadolý agenttigi.
Bul týraly Túrkııanyń Mádenıet jáne týrızm mınıstri Mehmet Nýrı Ersoı málim etti.
Mınıstrliktiń jazbasha habarlamasyna sáıkes, kórme Kolızeı arheologııalyq alańynda kelýshilerge esigin aıqara ashady. Bul – Rımniń eń mańyzdy tarıhı nysandarynyń biri.
Ekspozıtsııa aıasynda qoıylatyn 221 jádigerdiń 50-i alǵash ret kópshilik nazaryna usynylady. Sondaı-aq jádigerlerdiń 99-yn Troıa mýzeıi usynady. Barlyq eksponattar Italııa astanasy Rım qalasyna halyqaralyq saqtaý jáne qaýipsizdik standarttaryna saı jetkiziledi.
Kórme Troıa soǵysyna deıingi Anadoly tarıhyn da qamtıdy jáne b.z.d. III myńjyldyqtan Rım dáýiriniń sońyna deıingi kezeńdi kórsetedi.
Mehmet Nýrı Ersoı NSocial áleýmettik jelisinde jarııalaǵan jazbasynda:
– Biz Troıany álemdik týrızmniń basty núkteleriniń biri – Kolızeıge alyp kelemiz. Ótken jyldyń jeltoqsanynan bastap alty óńirlik zerthananyń restavratorlary jádigerlerdi halyqaralyq standarttarǵa saı kórmege daıyndaý úshin aýqymdy konservatsııalyq jumystar júrgizip jatyr. ICOM standarttaryna sáıkes saqtandyrý, tasymaldaý jáne saqtaý protsesteri erekshe muqııat atqarylyp jatyr, – dep atap ótti.
Eske sala ketsek, Atbasardaǵy mýzeıde Sáken Seıfýllınniń ómiri men murasyna arnalǵan kórme ashylǵanyn jazdyq.
