Shoqan Ýálıhanov týraly monografııa alǵash ret ıtalıan tilinde jaryq kórdi
ASTANA. KAZINFORM — Qazaqstan Respýblıkasynyń Mádenıet jáne aqparat mınıstri Aıda Balaevanyń Italııaǵa jumys sapary aıasynda «Shoqan Ýalıhanov jáne qazirgi Qazaqstannyń bastaýy» atty monografııanyń tanystyrylymy ótti. Bul týraly vedomstvonyń baspasóz qyzmeti málim etti.
Belgili aǵartýshynyń 190 jyldyǵyna arnalǵan bul kitap alǵash ret ıtalıan tilinde jaryq kórdi. Aıda Balaeva uly ǵalym, aǵartýshy ári saıahatshyǵa arnalǵan eńbektiń jaryq kórýimen barsha zertteýshilerdi quttyqtady. Mınıstrdiń aıtýynsha, Shoqan Ýálıhanovtyń murasyn ıtalıan oqyrmandaryna tanystyrý – Qazaqstan men Italııa arasyndaǵy rýhanı baılanysty tereńdetetin mańyzdy qadam.
– Shoqan Ýálıhanov – Uly Dalanyń ǵana emes, álemdik deńgeıdegi tulǵa. Onyń zertteýleri halyqaralyq ǵylymı qaýymdastyqqa Ortalyq Azııa halyqtarynyń baı mádenıeti men órkenıetin, sondaı-aq qazaq halqynyń rýhanı murasyn keńinen tanytty. Onyń eńbekteriniń ıtalıan tilinde jaryq kórýi – bilim men ǵylym arqyly eki eldiń jaqyndasýynyń jarqyn úlgisi. Bul kitap ıtalııalyq oqyrmandarǵa qazaqtyń tarıhyn, mádenıetin jáne oı álemin jaqynyraq tanýǵa múmkindik beredi, – dedi Aıda Balaeva.
Mınıstr sondaı-aq eki eldiń ǵalymdaryna, zertteýshilerine, aýdarmashylary shynaıy alǵys bildirdi. Ol bul kezdesý Qazaqstan men Italııa arasyndaǵy ǵylymı baılanystardy nyǵaıtyp, jas ǵalymdar men zertteýshilerdi jańa izdenisterge jeteleıtinine senim bildirdi. Shoqan Ýálıhanovtyń ómirbaıanyn ıtalıan professory Federıko Pastore jazǵan. Ol uzaq jyldar boıy ǵalymnyń ómiri men qyzmetine qatysty qazaqstandyq derekkózderdi zerttegen. Sondaı-aq monografııada Sh.Ýálıhanov ómirinde kezdesken belgili qazaq qaıratkerlerine arnalǵan aýqymdy bólim bar.
Kitap Qazaqstan Respýblıkasynyń Italııa Respýblıkasyndaǵy Elshiliginiń qoldaýymen, Sandro Teti Editore baspasynan, qazaqstandyq «Kaspıı Neft» AQ men Doscar Foundation Charity Fund korporatıvtik qorynyń demeýshiligimen jaryq kórdi. Zertteý sonymen qatar aǵylshyn tilinde de qoljetimdi.
Eske sala keteıik, buǵan deıin Shoqan Ýálıhanov shyǵarmalary tuńǵysh ret aǵylshyn tilinde jaryq kórgen bolatyn.
Al tamyz aıynda Bishkekte Shoqan Ýálıhanov týraly derekti fılmniń tusaýkeseri ótti.