Rımde ótetin Izraıl men Lıvan kelissózderi qazanǵa shegerildi
ASTANA. KAZINFORM – AQSh Izraıl men Lıvan shekarasyndaǵy shıelenisti báseńdetýge baǵyttalǵan kelisimdi iske asyrý boıynsha bitimgershilik jumystaryn jalǵastyryp keledi.
Kelesi aptada Rımde ótýge tıis Izraıl men Lıvan arasyndaǵy kelissózderdiń jańa raýndy qazanǵa shegerildi. Bul týraly AQSh Memlekettik departamentiniń ókili jeksenbide Reuters-ke málimdedi.
Buǵan deıin kelissózderdi 15-16 qyrkúıekte ótkizý josparlanǵany týraly habarlaǵan edik.
Rımdegi kezdesý keıinge shegerilgenine qaramastan, Izraıl men Lıvan elshileri kelesi aptada AQSh Memlekettik departamentinde júzdesedi. Kezdesýde Vashıngtonnyń qatysýymen jasalǵan negizdemelik kelisimniń júzege asyrylý barysy talqylanady.
— Kelisimdi odan ári júzege asyrý Lıvannyń egemendigin qalpyna keltirýdiń jáne Izraıldiń qaýipsizdigin qamtamasyz etýdiń jalǵyz tıimdi tetigi bolyp qala beredi, — dedi AQSh Memlekettik departamentiniń ókili.
Izraıl sheneýniginiń aıtýynsha, kezdesý taraptardyń jumys kestesi sáıkes kelmeýine baılanysty keıinge shegerilgen. AFP málimetinshe, buǵan BUU Bas Assambleıasynyń sessııasyna daıyndyq, qyrkúıektegi evreı merekeleri jáne Lıvan Qarýly kúshterin qoldaýǵa arnalǵan Parıj konferentsııasy da sebep bolǵan. Kelissózderdiń qazan aıyndaǵy naqty kúni áli belgilengen joq.
Lıvan prezıdenti Jozef Aýn qazirgi ýaqytta Izraılmen jańa kelissózder júrgizilip jatpaǵanyn rastady.
Maýsymda jasalǵan úshjaqty negizdemelik kelisim memlekettik emes qarýly qurylymdardy qarýsyzdandyrýdy, Izraıl áskerin Lıvannyń ońtústiginen kezeń-kezeńimen shyǵarýdy jáne bul aýmaqqa Lıvan armııasynyń bólimderin ornalastyrýdy kózdeıdi. «Hezbolla» qozǵalysy men onyń odaqtastary bul kelisimdi qoldamaıdy.
Kelissózderdiń jetinshi raýndy tamyzda Rımde aýmaqtyq máseleler boıynsha naqty nátıjege qol jetkizilmeı aıaqtaldy.
Izraıl áskeri Lıvan aýmaǵynda qurylǵan, tereńdigi shamamen 10 shaqyrym bolatyn býferlik aımaqta áli de tur. Izraıl bul áskerdiń onda ornalasýyn soltústiktegi eldi mekenderdi «Hezbollanyń» shabýyldarynan qorǵaý qajettigimen túsindiredi.
Sáýirde jarııalanǵan atysty toqtatý týraly kelisimge qaramastan, taraptardyń ózara shabýyldary tómen qarqynmen áli de jalǵasyp jatyr. Lıvan Densaýlyq saqtaý mınıstrliginiń málimetinshe, naýryzdan beri Izraıldiń soqqylarynan 4,3 myńnan astam adam qaza tapqan.
Birneshe kún buryn Izraıl áskeri Lıvannyń ońtústigindegi «Hezbolla» qozǵalysyna tıesili týnnelder ornalasqan taý jotasyn jaryp jiberdi. Jarylys kúshi 4,1 baldyq jerasty dúmpýlerine sebep boldy.
Buǵan deıin Izraıl áskerı ushaqtary Lıvannyń ońtústigine birneshe ret soqqy jasaǵany habarlanǵan bolatyn.
Aqzat Baqytjanqyzy
