Rımde qıraǵan kóne munara úıindisiniń astynda qalǵan jumysshy syrtqa shyǵaryldy

ASTANA. KAZINFORM — Dúısenbi kúni Rımniń tarıhı ortalyǵynda — Kolızeı mańynda jáne Rım forýmynyń janynda bıiktigi 29 metrlik Torre dei Conti ortaǵasyrlyq munarasynyń bir bóligi qulady. Jergilikti BAQ-tyń habarlaýynsha, uzaq ýaqyt úıindi astynda qalǵan jumysshy qutqaryldy.

Er adam Kontı munarasynyń bóligi qulaǵannan keıin shamamen 12 saǵat ótken soń, jergilikti ýaqyt boıynsha 23:00-de qırandy astynan shyǵaryldy. Ol dereý aýrýhanaǵa jetkizildi.

Rýmynııanyń Syrtqy ister mınıstrligi bul adamnyń rýmynııalyq azamat ekenin habarlady. Úıindi astynan qutqarylǵan taǵy bir jumysshy da rýmynııalyq. Úsh adamnyń qutqarylǵany, olardyń bireýiniń jaǵdaıy óte aýyr ekeni aıtyldy.

Munaraǵa kóp jyldan beri kirýge tyıym salynǵan, onda restavratsııa jumystary júrgizilip jatqan.

Rım meri Roberto Gýalterı «Biz onyń saýyǵyp ketetinine úmittenemiz», dedi.

Rım prefektisi Lamberto Djannını jýrnalısterge bul jumysshynyń úıindiden «uzaqqa sozylǵan qutqarý operatsııasynan» keıin shyǵarylǵanyn aıtty. Buǵan deıin ol jaǵdaıdy «óte kúrdeli» dep sıpattaǵan.

Eske sala ketsek, Notr-Dam de Parı shirkeýiniń munaralary órtten keıin qaıta ashyldy.

Al Italııa Kolızeıdi jańǵyrtýǵa 18 mln. eýro bólgenin jazǵanbyz.