Rımde qazaqstandyq dızaınerler men zergerlerdiń toptamalary tanystyryldy
Oǵan ıtalıandyq dızaınerler, ónertanýshylar, sýretshiler, dıplomatııalyq korpýs ókilderi, jýrnalıster jáne t.b. 100-dem asa adam qatysty.
Tanystyrylymnyń maqsaty – ıtalıandyq aýdıtorııany sándik-qoldanbaly ónerde bolyp jatqan úrdister arqyly Qazaqstannyń ulttyq salt-dástúrimen tanystyrý, sebebi ol kez kelgen mádenıettiń quramdas bóligi jáne qalyptasý quraly bolyp tabylatyn biregeı tarıhty, dástúrdi jáne ulttyq murany beıneleıdi.
Іs-sharaǵa qatysýshylardyń aldynda sóz sóılegen Qazaqstannyń Italııadaǵy Elshisi Erbolat Sembaev eýropalyqtardyń Azııamen tanysýy ıtalıandyq ataqty saıahatshy Marko Polonyń Uly Jibek jolynyń edáýir bóligi ótken qazirgi Ortalyq Azııa aýmaǵyn mekendegen halyqtardyń salt-dástúrleri men ómir saltynyń erekshelikterin sýrettegen shyǵarmalarynan bastaý alǵanyn atap ótti.
«Biz ata-babalarymyzdyń dalalyq jan dúnıesiniń ózindik ereksheligi men sulýlyǵy týraly qazaqstandyq daryndy kıim jáne zergerlik buıymdar dızaınerleriniń toptamalaryndaǵy jarqyn beıneler arqyly jetkizgimiz keledi», – dedi E. Sembaev.
Tanystyrylymdy bas dırektory Samal Tóleńgitova «Tekemet-Syrmak» kompanııasynyń kıizden jasalǵan buıymdar toptamasy ashty. Kórermenderge kıizdi jibekke basyp, jibek mataǵa erekshe órnekter jasaýǵa múmkindik beretin, zamanaýı tehnologııamen úılestirilgen dástúrli qolóner arqyly jasalǵan shapandar men sharftar kórsetildi.
Odan ári qazaqstandyq sángerler kópshilik nazaryna Eýrazııalyq dızaınerler odaǵynyń múshesi, belgili sýretshi-zerger Nurdos Álıasqarovtyń áshekeı buıymdaryn usyndy. Ulttyq naqyshta jasalǵan syrǵa, bilezik syndy áıelderdiń túrli áshekeıleri kórsetildi.
Sonymen birge sángerler zamanaýı dızaında ámbebap kıim úlgisi bolyp tabylatyn etno-dızaıner Tárbııa Aıdymbaevanyń áıelder men erler shapandarynyń toptamasyn kórsetti. Tanystyrylym qalyńdyqtyń dástúrli toı kıimin kórsetýmen aıaqtaldy.
Qonaqtar sondaı-aq kilem jáne basqa da kıizden jasalǵan buıymdar kórmesin tamashalady.
