Rımde dástúrli ásemdik karnavaly bastaldy
ASTANA. QazAqparat - Italııa astanasynyń kóshelerinde keshe dástúrli ásemdik karnavaly bastaldy. Bul sharalar eki aptaǵa sozylyp, 4 naýryz kúni merekelik otshashýmen aıaqtalady, dep jazady RIA Novostı.
Burnaǵy jyldardaǵydaı, Rım karnavalynyń negizgi alańy Pıatstsa-del-Popolo bolmaq. Merekeniń alǵashqy kúni qalanyń basty kóshesi Vıa-del-Korso boıymen túrli-tústi jasandyrylǵan ekıpajdar men at gvardııasy ótedi. Al aldaǵy 11 kúnde júzdegen sharalardy ótkizý josparlanǵan. Onyń ishinde dástúrli ıtalııandyq taǵamdardan tegin dám tatý, eń úzdik karnavaldyq kostıýmge baıqaýlar jáne qýyrshaq teatrynyń qoıylymdary uıymdastyrylmaq.
Rımdegi bılik ókilderi elde HІH ǵasyrǵa deıin atalyp ótilgen bul sharany birneshe jyl buryn qaıta jańǵyrtqan bolatyn. Onyń tanymaldylyǵy qazir Venetsııadaǵy eń áıgili karnavaldan asyp ketpese, kem túspeıdi. Alǵashqy zamanaýı karnaval Rımde 2009 jyly ótken edi. Ol jurtshylyqtyń esine 100 jyldan astam ýaqyt buryn umytylyp ketken sharany salyp, olardyń qyzyǵýshylyqtaryn oıatty.
Buryn bolǵan sol merekelerde at jarystary, betperde sherýleri, teatrlandyrylǵan kórinister uıymdastyrylatyn. Adamdardyń sol kezdegi bir-birine túrli-tústi qaǵazdardan jasalǵan kishkentaı beınelerdi laqtyrý dástúri áli kúnge deıin óz jalǵasyn taýyp keledi.
