Rımde AQSh pen Iran kelissózderiniń 2-shi kezeńi aıaqtaldy
ASTANA. KAZINFORM — Búgin, 19 sáýirde Italııanyń astanasy Rımde ótken Iran men AQSh delegatsııalary arasyndaǵy ıadrolyq kelisim boıynsha janama keńesýlerdiń ekinshi kezeńi aıaqtaldy. Bul týraly Mehr agenttigi habarlady.
Basylymnyń málimetinshe, kelissózder «jospardaǵydaı» ótken.
— Osynyń barlyǵy ekinshi týrdyń da syndarly rýhta aıaqtalǵanyn kórsetedi, — delingen habarlamada.
Kelissózder Oman Elshisiniń rezıdentsııasynda ótti. Iran delegatsııasyn Syrtqy ister mınıstri Abbas Aragchı basqarǵany atap ótildi. Mınıstr ıtalıandyq áriptesi Antonıo Taıanımen de kezdesti.
Kelesi kezeń 26 sáýirde ótedi
TASS agenttiginiń habarlaýynsha, Iran Syrtqy ister mınıstri Abbas Aragchı kelesi kezeńge deıin sarapshylar deńgeıinde tehnıkalyq konsýltatsııalar ótetinin málimdegen.
Iran men AQSh arasyndaǵy janama kelissózderdiń kelesi kezeńi Islam respýblıkasy Syrtqy ister mınıstrliginiń basshysy Abbas Aragchı men AQSh prezıdentiniń arnaıy ókili Stıven Ýıtkofftyń qatysýymen sáýirdiń 26-sy kúni Omanda ótedi.
— Sársenbi kúni Omanda sarapshylar deńgeıinde tehnıkalyq konsýltatsııalar bolady, al kelesi senbide biz sarapshylardyń jumysynyń nátıjelerin talqylaý úshin taǵy da kezdesemiz, — dedi Aragchı Irannyń memlekettik telearnasyna bergen suhbatynda.
Aıta keteıik, ústimizdegi jyldyń 12 sáýirinde Omanda Tegeran men Vashıngton arasynda Irannyń ıadrolyq baǵdarlamasy tóńiregindegi jaǵdaıdy retteý maqsatynda janama kelissózder ótti. Iran Syrtqy ister mınıstri Abbas Aragchı men AQSh prezıdentiniń arnaıy ókili Stıv Ýıtkoff qatysty.
MAGATE buǵan deıin Iran men AQSh arasyndaǵy ıadrolyq kelissózderdi qaıta bastaýǵa kómektesýge daıyn ekenin málimdegen bolatyn.