Rımde Abaı Qunanbaıulynyń músini ornatylady

ASTANA. KAZINFORM — Bıyl Rım qalasynda qazaqtyń bas aqyny Abaı Qunanbaıulynyń músini ornatylady. Bul týraly Aqordada Italııa Prezıdenti Serdjo Mattarellamen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty. 

— Kelissóz barysynda mádenı-gýmanıtarlyq baılanystardy odan ary nyǵaıtý isine nazar aýdardyq. Búgin elorda kósheleriniń birine Italııanyń uly saıahatshysy Marko Polonyń aty berildi. Kelesi jyly Italııada «Kóshpendiler altyny» kórmesi ótkizilmek. Sondaı-aq Neapoldegi kóne San-Karlo teatrynda Abaı operasyn qoıý josparlanǵan. Bıyl Rım qalasynda qazaqtyń bas aqyny Abaı Qunanbaıulynyń músini ornatylady. Osy sátti paıdalana otyryp, ıgi bastamaǵa qoldaý bildirgeni úshin Italııa halqyna shynaıy rızashylyǵymdy jetkizgim keledi. Biz muny qazaqtyń mádenı murasyna kórsetilgen qurmet pen shynaıy dostyq peıildiń kórinisi dep qabyldaımyz. Osyndaı taǵlymdy is-sharalar halyqtarymyzdy jaqyndata túsetini sózsiz, — dedi Qasym-Jomart Toqaev.

Aıta keteıik, Memleket basshysy Qasym-Jomart Toqaev Italııa Prezıdenti Serdjo Mattarellany birinshi dárejeli «Dostyq» ordenimen marapattady.