Rımde 2026 jylǵy Olımpıada oıyndarynyń alaýy jaǵyldy
ASTANA. KAZINFORM - Rımdegi Pıatstsa del Kvırınale alańynda Mılan-Kortına-2026 qysqy Olımpıada oıyndarynyń alaýyn jaǵý saltanatty rásimi ótti, dep habarlaıdy Ulttyq olımpıadalyq komıtet.
Grekııadan aldyńǵy kúni jetkizilgen Olımpıada alaýyn Italııa prezıdenti Serdjo Mattarella resmı túrde tutatty.
Sharaǵa Halyqaralyq Olımpıadalyq komıtetiniń prezıdenti Kırstı Koventrı, Olımpıada oıyndaryn uıymdastyrý komıtetiniń basshysy Djovannı Malago jáne Italııanyń Ulttyq Olımpıadalyq komıtetiniń jetekshileri qatysty.
Kırstı Koventrı quttyqtaý sózinde Olımpıada alaýynyń urpaqtar sabaqtastyǵyn baılanystyratyn jáne olımpıadalyq qozǵalystyń bastapqy máni - shabyttandyrýdy, biriktirýdi jáne ár sportshynyń eshqandaı kemsitýsiz jarysqa qatysý quqyǵyn qorǵaýdy eske salatyn sımvoldyq kúshi bar ekenin atap ótti.
Sondaı-aq ol Italııada ótetin oıyndar óziniń prezıdent retindegi alǵashqy qysqy Olımpıadasy bolatynyn aıtyp, bul oıyndar sportshylar úshin de, búkil álem úshin de jarqyn oqıǵaǵa aınalatynyna senim bildirdi.
Al Italııa prezıdenti Serdjo Mattarella Olımpıada alaýynyń beıbitshilik, birlik jáne ózara qurmet belgisi ekenin erekshe atap ótti.
Onyń aıtýynsha, Olımpıada men Paralımpıada oıyndary adamzatpen bárine ortaq, túsinikti tilde sóılese alatyn erekshe kúshke ıe ekenin jetkizdi. Sondaı-aq bul oıyndar teńdik, qurmet jáne alǵa umtylý sııaqty qundylyqtardy eske salatynyn aıtty.
Mattarella oıyndarǵa deıingi joldyń jaýlasý men óshpendilikten bas tartý kezeńine aınalýyna úmit artty. Ol Mılan men Kortınada oıyndardy birlesip ótkizý Italııanyń ashyqtyǵy men ulttyq birliginiń aıqyn kórinisi ekenin aıtty.
Sóz sońynda Djovannı Malago prezıdentke alaýdy tapsyrdy. Al Italııa Prezıdenti alańda ornatylǵan Olımpıadalyq shamdy jaqty.
Aıta keteıik, alaý Rımge jetkizilgennen keıin estafetanyń alǵashqy metrlerin Djovannı Malago men tennısshi Jasmın Paolını júrip ótti.
Italııa aýmaǵyndaǵy Olımpıada alaýynyń resmı estafetasy 6 jeltoqsanda bastalady. Marshrýt eldiń mańyzdy mádenı jáne tarıhı aımaqtaryn, sonyń ishinde kóptegen ıÝNESKO nysanyn qamtıdy.
Mılan-Kortına-2026 qysqy Olımpıada oıyndary 6-22 aqpan aralyǵynda ótedi.
Osyǵan deıin 2026 jylǵy Mılan Olımpıadasynyń alaýyn áıgili fýtbolshy alyp júretini týraly jazdyq.