Rım Papasynyń úndeýi jer júzindegi mıllıondaǵan adamǵa úmit pen senim syılaǵany anyq - QR Prezıdenti

NUR-SULTAN. QazAqparat – Rım Papasynyń úndeýi jer júzindegi mıllıondaǵan adamǵa úmit pen senim syılaǵany anyq. Bul týraly elordada ótken Álemdik jáne dástúrli dinder lıderleri VII Seziniń jabylý saltanatynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

QR Prezıdenti Vatıkan basshysy, Rım Papasy Frantsıskke elimizge jasaǵan tarıhı sapary jáne sezd jumysyna belsene qatysqany úshin rızashylyǵyn bildirdi.

«Sizdiń zor daýysyńyz ben qýatty úndeýińiz álemniń kóptegen mıllıon adamy úshin senim men shabyttaný kózine aınalaryna senimdimin. Qazaq halqynyń jáne jeke óz atymnan taǵy da shynaıy alǵys bildiremin. Sezd jumysyna ózińizdiń belsene qatysýyńyz biz úshin zor mártebe. Sizdiń álem jurtshylyǵyna arnalǵan úndeýińiz jer júzindegi mıllıondaǵan adamǵa úmit pen senim syılaǵany anyq», - dedi Qasym-Jomart Toqaev.