Rım Papasynyń elordadaǵy messasyna 13 elden adamdar qatysty
Álemdik jáne dástúrli dinder lıderleriniń VII sezin uıymdastyrýshylardyń málimetinshe, dinı rásimge kez kelgen din men konfessııanyń ókili qatysa aldy. Halyq úshin 5 myń otyratyn, 1,7 myń turyp tyńdaıtyn oryn daıyndaldy. Barlyq oryn tolǵan.
«Qasıetti Krestiń kóterilý merekesine baǵyshtalǵan messaǵa respýblıka óńirlerinen, alys jáne jaqyn shetelderden myńdaǵan qajy qatysty. Shet elderdiń geografııasy mynadaı: Rýmynııa, Germanııa, Polsha, Reseı, Ózbekstan, Qyrǵyzstan, Mońǵolııa, Ázerbaıjan, Grýzııa, Túrikmenstan, Belarýs, Tájikstan», - delingen uıymdastyrýshylar habarlamasynda.
Ýaǵyzdy bastamas buryn Rım Papasy qoǵamdyq saparlarǵa arnalǵan óziniń arnaıy kóligi – papamobılmen jınalǵandardyń aldynan júrip ótti.
Rım Papasy messa barysynda beıbitshilik pen ádildiktiń zor qundylyǵyn atap ótti. Ol qarýly qaqtyǵystarǵa qarsy shyǵyp, Qazaqstan Respýblıkasyna óziniń saparyn uıymdastyrǵany úshin alǵys bildirdi. Sonymen qatar Qazaqstan halqyna batasyn berip, Qasıetti messa tostaǵanyn syıǵa tartty.
Papanyń ýaǵyzy men duǵasy bir saǵattan astam ýaqytqa sozyldy. Ýaǵyz mátinimen Vatıkannyń resmı saıtynan tanysýǵa bolady.
Aıta keteıik, Rım Papasynyń Qazaqstanǵa sapary – rýhanı jáne saıası máni bar óte mańyzdy oqıǵa. Pontıfık búkil álemde joǵary bedelge ıe, soǵystardyń, kedeıliktiń, genderlik teńsizdiktiń ótkir máselelerin kóterip júredi. Al onyń pikiri mindetti túrde tyńdalady.
Vatıkan men Rım-katolık shirkeýiniń basshysy Ioann Pavel ІІ-niń Qazaqstanǵa aldyńǵy sapary 2001 jyldyń qyrkúıeginde, Nıý-Iork qalasynda 11 qyrkúıek kúni bolǵan qaıǵyly teraktiden birneshe kún ótken soń bolǵan edi.
«Álemdik jáne dástúrli dinder lıderleriniń sezin Qazaqstanda ótkizý ıdeıasy Papanyń sapary kezinde týyndady. Eki jyldan keıin, 2003 jyly 23-24 qyrkúıekte Astanada Álemdik jáne dástúrli dinder lıderleriniń I sezi ótti. Alǵashqy kúnderden bastap Vatıkan da sezdiń joǵary deńgeıdegi turaqty jáne belsendi qatysýshysy boldy.
Osylaısha, Rım Papasy Frantsısk Álemdik jáne dástúrli dinder lıderleriniń sezine qatysýyn rastaǵan Rım-katolık shirkeýiniń birinshi basshysy boldy», - dedi sez uıymdastyrýshylary.
