Rım papasyna ota jasalady
RIM. QazAqparat – Papa Frantsısk Rım aýrýhanasyna jatqyzyldy, oǵan ota jasalmaq, dep habarlaıdy QazAqparat ANSA-ǵa siltememen.
Vatıkannyń resmı ókili Matteo Brýnıdiń aıtýynsha, pontıfık Djemellı aýrýhanasynda jaryǵyn alyp tastaǵannan keıin qalpyna kelý úshin birneshe kún bolady.
BBC News málimetinshe, jaryq kesirinen Rım papasynda «qaıtalanatyn, aýyratyn jáne jaǵdaıyn nasharlatatyn» belgiler bar.
Keıingi jyldary 86 jastaǵy pontıfıktiń densaýlyǵynda kinárat bolǵan. Onyń tizesi únemi aýyratyndyqtan, múgedekter arbasy men taıaq paıdalanady.
Vatıkan málimdemesinde sońǵy kúnderi medıtsına brıgadasy pontıfıkke ota jasaý kerek degen sheshimge kelgeni aıtylady.
«Otadan keıin tolyq fýnktsıonaldy qalpyna kelýi úshin birneshe kún medıtsınalyq mekemede bolady», - dep atap ótti Brýnı.
Buǵan deıin Papa Frantsısk sársenbide apta saıynǵy aýdıentsııasyn qalypty rejımde ótkizdi jáne josparly ota týraly aıtpady.
Bir kún buryn ol bronhıtpen aýrýhanaǵa túskennen keıin birneshe aı ótken soń Rımdegi em qabyldaǵan aýrýhanasynda josparly tekserýden ótti.
Naýryzda ol pontıfıkatynyń 10 jyldyǵyn atap ótken ýaqytta ókpe ınfektsııasyn emdeý úshin aýrýhanada úsh kún boldy.
2021 jyly Rım Papasy Frantsısk ishektiń aýyrǵanynan aıyǵý úshin toq ishektiń bir bóligin alyp tastaǵannan keıin aýrýhanada 10 kún boldy. Jaqynda ol taǵy da sol máselege shaǵymdana bastady.
Densaýlyǵyndaǵy kinárattarǵa qaramastan, Rım Papasy Frantsısktiń kestesi áli de tyǵyz. Ol tamyz aıynda Portýgalııa men Mońǵolııaǵa barýy kerek.
