Rım Papasyn kórý úshin Qazaqstanǵa álemniń túrli elinen 3 myń adam keledi

NUR-SULTAN. QazAqparat - Rım Papasyn kórý úshin Qazaqstanǵa álemniń túrli elinen 3 myń adam keledi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Elordaǵa Rım Papasy Frantsıs keledi. Sapar aıasynda Pontıfıktiń Memleket basshysymen kezdesý, Qazaqstan jurtshylyǵy men dıplomatııalyq korpýs aldynda sóz sóıleýi, Messasy, sonymen qatar Álemdik jáne dástúrli dinder lıderleriniń VII sezine qatysý josparlanýda. Qazaqstanǵa álemniń túrli elderinen 3000-ǵa jýyq qajylar keledi dep kútilýde», - dedi Aıbek Smadııarov.

Ol Katolık shirkeýiniń basshysy Qazaqstanǵa ekinshi ret kelip otyrǵanyn atap ótti.

«Rım Papasy Frantsısktiń elimizge memlekettik sapary Rım Papasy Ioann Pavel II Qazaqstanǵa 2001 jyly kelgennen keıin alǵash ret ótedi. Bul Qasıetti Taqtyń Qazaqstannyń álemdik arenadaǵy, jáne birinshi kezekte, beıbitshilik jolyndaǵy dıalogty nyǵaıtý isindegi mańyzdy rólin moıyndaǵanyn aıǵaqtaıdy», - dedi ol.

Foto:verelq.am