Rım papasy taǵyna úmitker Nıý-Iork eparhııasyndaǵy pedofıldik áreketi úshin jaýap berip jatyr
ASTANA. 23 aqpan. QazAqparat - Rım papasy taǵyna úmitker Nıý-Iork arhıepıskopy Tımotı Dolanǵa eparhııaǵa qarasty balalarǵa kóz súzgen svıaşennıkterdiń ústinen qozǵalǵan is boıynsha tergeý júrip jatyr. «The New York Times» aqparatyna qaraǵanda, odan qylmysy áshkere bolǵan «áýlıe ákeılerdiń» tizimin qandaı maqsatta jarııalamaq bolǵany jáne olardyń jat ádetke qashannan beri boı aldyrǵanyn qalaı bilgeni suraldy.
muslim.kz saıtynyń jazýynsha, jýyrda Rımge júrer aldynda Dolan ant-sý iship, 2002-2009 jyldary ózi basqarǵan Mılýokı arhıeparhııasyndaǵy katolık svıaşennıkteriniń is áreketteri jaıly túsinikteme berdi.
Svıaşennıkterdiń pedofıldigine qatysty daý-damaı 2010 jyly tutanǵan bolatyn. 2010 jyly búginde dúnıeden ozǵan Loýrens Merfı esimdi svıaşennıktiń birneshe jyl boıy mylqaý ári sańyraý balalarǵa arnalǵan mekteptiń ul balalaryn zorlap kelgeni áshkere bolǵan edi. Qylmysker tıisti jazasyn almaǵan, al osyǵan qatysty aqparatty shirkeý basshylyǵy qupııa ustap kelgen. Keıin tergeý kezinde belgili bolǵandaı, svıaşennıkten 500-den asa bala jábir kórgen.
2011 jyly Dolannyń izin basyp, isin jalǵastyrýshy Djer Lıstekı pedofılder qurbanyna aınalǵandardyń sot úkimine sáıkes, 9 mln dollar tólegen Mılýokıdiń bankrotqa ushyrap, taqyrǵa otyrǵanyn moıyndaýǵa májbúr boldy. Qazirgi ýaqytta Dolan Nıý-Iorktegi eparhııany basqarady jáne AQSh-tyń katolık epıskoptary konferentsııasynyń prezıdenti bolyp qyzmet atqarady. Ony bul orynǵa 2012 jyldyń aqpan aıynda Papa Benedıkt taǵaıyndaǵan bolatyn. Amerıkalyq «Time» jýrnaly arhıepıskopty eń yqpaldy adamdardyń qataryna qosqan edi.
2013 jyldyń naýryz aıynda Dolan jańa pontıfıkti saılaý jónindegi konklavqa qatysty. Onyń ózi basty úmitkerlerdiń biri bolsa da, Vatıkannyń taǵynda otyratyn adamnyń aǵylshyn tildi bolǵanyn qalaıtynyn jasyrmaı aıtty.
