Rım Papasy qazaqtyń «jeti shelpek» dástúrin eske aldy

NUR-SULTAN. QazAqparat – Rım Papasy Frantsısk QR Prezıdenti Qasym-Jomart Toqaevpen birge elordadaǵy «Qazaqstan» ortalyq kontsert zalynda ótken kezdesýinde dombyranyń qasıetine birneshe ret toqtaldy, dep habarlaıdy QazAqparat tilshisi.

Pontıfık kezdesýde aıtqan tuşymdy oılaryn dombyranyń san túrli qasıetimen sabaqtastyra otyryp baıandap shyqty.

«Osy saparǵa daıyndalǵan kezimde bul jerdegiler orta ǵasyrlarda dombyranyń birneshe túrimen dastan aıtyp, sol arqyly ótken men búgindi baılanystyrǵanyn bildim. Alýandyq sabaqtastyǵynyń sımvoly tutas eldiń jadynda osylaı yrǵaq bolyp saqtalǵan. Dombyra búgin de ekonomıkalyq jáne áleýmettik ózgeristerdiń jyldam aýysyp jatqanyna qaramastan aldyńǵy lektegi býynnyń ómirin umytttyrmaı keledi», dedi mártebeli Frantsısk.

Onyń paıymynsha, qazaq jerinde yntymaqtyń gúldenip turýyna kóneden kele jatqan dástúr de negiz bolyp otyr.

«Yntymaqtyń gúldenýine sált-dástúrdiń de úles qosyp otyrǵany anyq. Sol arqyly ótkenniń qundylyqtary qasterli qazynaǵa aınalyp, mura bolyp qalyp otyr. Meniń esime bul jaqta keń taralǵan «jeti shelpek» atty tańǵajaıyp dástúr kelip otyr –jumanyń tańynda jeti shelpek taratyp, ata-babany eske alady», - dedi Rım Papasy.