Rım Papasy Dımash Qudaıbergenge syılyq alyp keldi

NUR-SULTAN. QazAqparat – Nur-Sultanǵa memlekettik saparmen kelgen Rım Papasy Frantsısk álemge áıgili qazaqstandyq ánshi Dımash Qudaıbergenge kádesyı tartý etti, dep habarlaıdy QazAqparat.

«Rım Papasy bergen bata-tilegińiz ben estelik syılyǵyńyz úshin úlken alǵys aıtamyz. Ǵumyryńyz uzaq bolsyn. Aǵataıdy da @kanat_sveta_aitbayevtar syılyǵymen quttyqtaımyz», - dep jazdy D.Qudaıbergen Instagram-daǵy jeke paraqshasynda.

Rım Papasymen jeke kezdesýge Dımashtyń ákesi Qanat Aıtbaev, QR Parlamenti Senatynyń tóraǵasy – Álemdik jáne dástúrli dinder kóshbasshylary sezi hatshylyǵynyń basshysy Máýlen Áshimbaev qatysqan.

Dımashqa Rım Papasy tartý etken medalon túrindegi syılyqta aǵylshyn tilinde «Qazaqstanǵa sapar, 13-15 qyrkúıek, 2022 jyl» degen jazýlar bar. Basty fonyna qolyna sábı kótergen ana beınesi ornalastyrylǵan.

Eske salaıyq, Rım Papasy Frantsısk Álemdik jáne dástúrli dinder kóshbasshylary sezine qatysý úshin Nur-Sultan qalasyna memlekettik saparmen 13 qyrkúıekte keldi. Ony áýejaıdan Qazaqstan Prezıdenti Qasym-Jomart Toqaev kútip aldy.

14 qyrkúıekte jumysyn bastaǵan sez otyrysynda Rım Papasy «Qazaqstan – bir-birinen alshaq ornalasqandardyń basyn qosatyn mańyzdy meken» ekenin atap ótti.