Rım Papasy Benedıkt XVI: «Palestınalyqtar táýelsiz memleket qurýǵa quqyly»
ASTANA. 6 jeltoqsan. QazAqparat - Rım papasy Benedıkt XVI BUU Bas Assambleıasynyń Palestınaǵa baqylaýshy memleket mártebesin berý týraly sheshimin qoldaıdy. Bul týraly muslim.kz habarlaıdy.
Astanadaǵy Áziret Sultan meshitiniń resmı saıtynyń jazýyna qaraǵanda, Rım Papasynyń resmı málimdemesinde bylaı delingen: «Bul máselege qatysty daýys berý Palestınany BUU memleketteri arasynan kórgisi kelgen kóptegen halyqaralyq qaýymdastyqtyń kóńil-kúıine jaǵymdy áser etti. Desek te, bul aımaqtaǵy qordalanǵan máselelerdi sheshýge áli de jetkiliksiz. Túıtkildi másele palestınalyqtar men ızraıldikterdiń beıbitshilik, turaqtylyq prıntsıpterin saqtap, zańnan attamaǵan jaǵdaıda ǵana túbegeıli sheshimin tappaq».
Málimdemede sondaı-aq Rım Papasynyń: «Budan bylaı qantógiske, qaqtyǵysqa, terrorızmge jol berilmesin!» - degen sózi de jazylǵan. Pontıfıktiń sózine qaraǵanda, palestınalyqtar táýelsiz memleket qurýǵa, onda laıyqty ómir súrýge jáne erkin júrip-turýǵa quqyly. Málimdeme «Izraıl men Palestına arasyndaǵy problemalardy sheshetin ózara sheshimi baıandy bolǵaı!», - degen Rım Papasynyń tilegimen aıaqtalǵan.
Kommıýnıke Qudys qalasyna «onyń qasıetti jerlerine barýǵa múmkindik beretin, Qudystyń kıeli sıpatyna kóleńke túsirmeıtin, ar-ojdan jáne nanym-senim bostandyǵyn, biregeıligin qamtamasyz etetin halyqaralyq deńgeıde kepildik berilgen» arnaıy mártebe berýge shaqyrýmen túıindeledi.
