Rım papasynyń Ońtústik Amerıkadaǵy sapary qyzylsha indetimen tuspa-tus keldi
ASTANA. KAZINFORM — Rım papasy XIV Levtiń Ońtústik Amerıkaǵa sapary kezinde ótetin jappaı dinı sharalar epıdemıologtardy alańdatyp otyr. Qyzylsha juqtyrǵandar sanynyń ósýine baılanysty birneshe eldiń bıligi ınfektsııanyń taralýyn baqylaýdy kúsheıtip, qosymsha vaktsınatsııa naýqandaryn qolǵa aldy. Bul týraly Kazinform agenttigi Euronews-ke silteme jasap habarlady.
Rım papasynyń sapary 6-17 qarasha aralyǵynda ótedi. Ol Ýrýgvaı, Argentına jáne Perýdi qamtıdy. Dinı rásimder men senýshilermen kezdesýlerge júzdegen myń, tipti mıllıondaǵan adam qatysady. Mamandardyń baǵalaýynsha, mundaı jıyndar qyzylshanyń taralý qaýpin arttyrady.
Panamerıkalyq densaýlyq saqtaý uıymy (PADU) epıdemıologııalyq qaýipti óte joǵary dep baǵalady.
2026 jylǵy qańtar men qazan aralyǵynda Amerıka elderinde qyzylshany juqtyrýdyń 57 666 rastalǵan jaǵdaıy tirkelip, 81 adam qaıtys bolǵan. Bul ótken jyldyń sáıkes kezeńimen salystyrǵanda 4,7 ese kóp. Infektsııa aımaqtyń 17 eli men aýmaǵynda anyqtalǵan.
Rım papasy myńdaǵan senýshiniń qatysýymen dinı rásimder ótkizgen Ýrýgvaıda bılik 29 qarashaǵa deıin epıdemıologııalyq baqylaýdy kúsheıtti. Bul pontıfıktiń elge sapary aıaqtalǵannan keıingi úsh apta ishinde ınfektsııa juqtyrýy múmkin adamdardy anyqtaýǵa múmkindik beredi.
Perýde vaktsınatsııa naýqany keńeıtildi. Ásirese balalar men jastarǵa, sondaı-aq Rım papasynyń sapar baǵdarlamasyna engen qalalardyń turǵyndaryna basymdyq berilip otyr.
Argentınada da mamandar adam kóp jınalatyn dinı sharalarǵa baılanysty qaýip bar ekenin eskertti.
PADU málimetinshe, qyzylshanyń keń kólemde taralýyna jol bermeý úshin halyqtyń keminde 95 paıyzy vaktsınanyń eki dozasyn alýy kerek. Alaıda aımaqtaǵy kóptegen elde bul kórsetkish qajetti deńgeıden tómen.
Uıym jappaı is-sharalarǵa qatysatyndar men saıahatshylarǵa ekpe mártebesin aldyn ala tekserýge keńes berdi.
Qyzylsha — eń juqpaly vırýstyq ınfektsııalardyń biri. Bul aýrý, ásirese, kishkentaı balalar men ımmýnıteti álsiregen adamdar úshin aýyr asqynýlarǵa ákelýi múmkin.