Rım Papasynyń densaýlyq jaǵdaıy qıyndap barady

ASTANA. KAZINFORM – Rım Papasy Frantsısktiń densaýlyq jaǵdaıy múshkil, dep habarlaıdy Anadolu Ajansı.

Katolık shirkeýiniń basshysy jáne Vatıkannyń memleket basshysy Papa Frantsısktiń demikpesi asqynǵan. Ol otteginiń kómegimen demalyp, trombotsıtter deńgeıiniń tómendeginen qan quıdyrǵan.

Vatıkan 14-shi aqpannan beri ókpe ınfektsııasynan keıin Rımniń Gemelli klınıkasynda em alyp jatqan 88 jastaǵy pontıfıktiń jaǵdaıy múshkil ekenin aıtty. Odan polımıkrob ınfektsııasy anyqtalyp, ókpesiniń eki jaǵy qabynǵany belgili boldy.

- Papanyń densaýlyq jaǵdaıy kúrdeli. Buryn da habarlaǵanǵandaı, ol áli qaýipti kezeńnen ótken joq, - delingen habarlamada.

Vatıkan málimetteri boıynsha, Rım Papasynyń tań ata demalýy qıyndap, ottegi terapııasyn qoldanyp, qan quıý qajet boldy.

Osyndaı sharalarǵa baılanysty Papa esin jıdy, alaıda onyń densaýlyq jaǵdaıy keshegiden qıyn.

Pontıfık dástúrli jeksenbilik minájat etý sharasyn ótkize almaıdy.

Al Vatıkannyń memlekettik hatshysy kardınal Petro Parolın Corriere della Sera basylymyna bergen suhbatynda pontıfıktiń yqtımal otstavkasyna qatysty pikir bildirdi.

Ol bul áńgimeni qajetsiz alyp-qashpa sóz ekenin, qazir eń bastysy pontıfıktiń densaýlyǵynyń ornyǵyp, Vatıkanǵa oralýy ekenin jetkizdi.

Osyǵan deıin Rım Papasy Frantsısktiń saýyǵyp kele jatqany, al álem katolıkteri ol úshin duǵa etip jatqany týraly jazdyq.