Rım Papasy XIV Lev aldaǵy kúnderi ota jasatpaq
ASTANA. KAZINFORM — Rım Papasy XIV Lev aldaǵy kúnderi ókpesindegi túıindi alyp tastaý úshin hırýrgııalyq ota jasatatynyn málimdedi. Bul týraly 71 jastaǵy pontıfık búgin Áýlıe Petr alańynda dástúrli jeksenbilik Angelus duǵasy kezinde aıtty. Bul týraly Kazinform agenttiginiń menshikti tilshisi habarlady.
XIV Levtiń aıtýynsha, jýyrda medıtsınalyq tekserýden ótken kezde dárigerler onyń ókpesinen shaǵyn ári belgili bir aımaqta ornalasqan túıindi anyqtaǵan.
— Ol óte erte kezeńde anyqtaldy jáne naqty bir aımaqta ornalasqan. Dárigerler ota jasaǵan durys dep eseptep otyr. Olardyń usynysyn eskere otyryp, túıindi alyp tastaý úshin ota jasatý týraly sheshim qabyldadym. Ota aldaǵy kúnderi ótedi, — dedi pontıfık.
Qasıetti Taqtyń baspasóz qyzmetiniń dırektory Matteo Brýnı ota osy aptanyń alǵashqy kúnderine josparlanǵanyn naqtylady. Otadan keıingi qalpyna kelý kezeńi shamamen bir aptaǵa sozylýy múmkin. Ota Rımdegi Agostino Gemelli aýrýhanasynda jasalady. Bul medıtsınalyq mekemede Rım papalary dástúrli túrde em qabyldaıdy.
Vatıkan ázirshe anyqtalǵan túıinniń qaterli isikke jatatyny nemese jatpaıtyny týraly aqparat bergen joq. XIV Lev senýshilerge qoldaýy úshin alǵys aıtyp, ózine duǵa baǵyshtaýdy ótindi.
Bul — 2025 jyldyń mamyrynda Rım Papasy Frantsısk qaıtys bolǵannan keıin onyń ornyna saılanǵan XIV Levtiń densaýlyǵyna qatysty alǵashqy habar.
Pontıfıktiń 6-17 qarasha aralyǵynda Latyn Amerıkasyna, atap aıtqanda Ýrýgvaı, Argentına jáne Perýge sapary josparlanǵan. Ota men qalpyna kelý kezeńiniń osy sapar kestesine áser etetini ázirshe belgisiz.
Eske salaıyq, munyń aldynda Olımpıada chempıony jáne XDS Astana Team komandasynyń bas menedjeri Aleksandr Vınokýrov Rım Papasyna qazaqstandyq komandanyń jeıdesin syılaǵanyn jazǵanbyz.
