Rım Papasy Taıaý Shyǵysta atysty toqtatyp, dıalog bastaýǵa shaqyrdy

ASTANA. KAZINFORM - Katolık shirkeýiniń basshysy Rım Papasy Lev XIV Iranda jáne jalpy Taıaý Shyǵys óńirinde shıelenistiń kúsheıýine baılanysty tereń alańdaýshylyq bildirdi. Bul týraly Kazinform agenttiginiń Brıýsseldegi menshikti tilshisi habarlady.

Pontıfık tıisti málimdemesin jeksenbi, 8 naýryz kúni Vatıkanda jasady. Rım Papasy óńirden kelip jatqan aqparattardyń qatty alańdatatynyn jetkizdi.

Onyń aıtýynsha, zorlyq-zombylyq pen qorqynysh kúsheıgen qazirgi jaǵdaı qaqtyǵystyń kórshi elderge taralý qaýpin arttyryp otyr.

Pontıfık ásirese Lıvandaǵy jaǵdaıǵa alańdaýshylyq bildirip, eldiń qaıtadan turaqsyzdyq kezeńine túsýi múmkin ekenin atap ótti.

— Bombalardyń gúrsili toqtap, qarýdyń úni óship, dıalogqa jol ashylyp, onda halyqtyń úni estilýi úshin Jaratqanǵa duǵa etemiz, — dedi Rım Papasy Lev XIV.

Óz úndeýinde Vatıkan basshysy qaqtyǵys taraptaryn tatýlasý men úmit jolyn tańdaýǵa shaqyrdy. Sondaı-aq halyqaralyq qaýymdastyqty shıelenisti báseńdetip, adam shyǵynynyń odan ári ósýine jol bermeý úshin kúsh biriktirýge úndedi.

Pontıfıktiń úndeýi óńirdegi qaýipsizdikti qamtamasyz etýge baǵyttalǵan halyqaralyq kúsh-jiger kúsheıip, daǵdarys aımaǵynan shetel azamattaryn evakýatsııalaý bastalǵan kezeńde jasaldy.

Al AQSh prezıdenti Donald Tramp Iranǵa óte kúshti soqqy jasalatynyn málimdedi.

28 aqpanda bastalǵan áskerı operatsııa barysynda AQSh alǵash ret jańa qarý túrleriniń birqataryn qoldanǵan. Málimetterge qaraǵanda, Iranda 6668 azamattyq nysan AQSh pen Izraıl shabýylyna ushyraǵan.

Sondaı-aq Iranda joǵarǵy jetekshi Álı Hameneıdiń qaza tabýyna baılanysty bılik tranzıti rásimi resmı túrde bastaldy. 8 naýryz kúni Irannyń Sarapshylar keńesi jańa joǵarǵy kóshbasshyny anyqtaǵany belgili boldy.