Rım Papasy Redjına Koelı túrmesine bardy

VATIKAN. KAZINFORM — Katolık áleminiń rýhanı kósemi Papa Frantsısk osy demalys kúnderi katolıkter atap ótetin Pasha meıramy qarsańynda túrmege bardy, dep jazdy Anadoly.

Vatıkannyń málimetinshe, Pasha aldyndaǵy beısenbi kúni – ıaǵnı «Qasıetti beısenbide» – Papa Frantsısk Rımdegi túrmelerdiń birinde Isa paıǵampar aıqyshqa shegelener aldynda 12 shákirtiniń aıaǵyn jýǵanyn eske túsiretin dástúrli rásim aıasynda Redjına Koelı túrmesine bardy.

Sapar barysynda Papa dinı bilim men túrmedegi túrli is-sharalarǵa turaqty qatysatyn túrli ult ókilderinen quralǵan 70 tutqynmen kezdesti.

Túrme dırektory Klaýdııa Klementı barlyq tutqyndardyń atynan Papa Frantsıskige alǵysyn bildirdi.

Jaqynda ózi aýyr bronhıt pen ekijaqty pnevmonııaǵa shaldyqqanyn aıtyp ótken Papa:

– Men jyl saıyn Qasıetti beısenbide Isanyń izimen túrmede tutqyndardyń aıaǵyn jýý rásimin ótkizýdi unatamyn. Bıyl densaýlyǵyma baılanysty bul rásimdi ótkize almaımyn, biraq sizderdiń januıalaryńyz úshin duǵa etip, sizdermen birge bolǵym keledi, – dedi.

Papa Frantsısk túrmede bar bolǵany 30 mınýt ýaqyt boldy.

Burynǵy jyldardan ózgeshe, bıyl densaýlyǵyn qalpyna keltirip jatqan Papa Pashaǵa arnalǵan dinı rásimderdi ózi ótkizbeıdi.

Eske sala keteıik, 14 aqpanda Papa Frantsısk aýyr bronhıtke baılanysty Rımdegi Djemellı aýrýhanasyna jatqyzylǵan bolatyn. Ol 23 naýryzda 38 kúndik emnen keıin ekijaqty pnevmonııa dıagnozymen aýrýhanadan shyqty.

Qazir Papa em qabyldap júr jáne tek mańyzdy sharalarda ǵana qysqa ýaqytqa kópshilik aldyna shyǵyp júr.