Rım Papasy Lev XIV Pasha messasynda álemdegi ádiletsizdik pen soǵysqa nazar aýdardy
ASTANA. KAZINFORM – Búgin Vatıkandaǵy Áýlıe Petr alańynda Rım Papasy Lev XIV bastaǵan saltanatty Pasha messasy ótti, dep habarlaıdy Kazinform agenttiginiń EO-daǵy tilshisi.
Merekelik qyzmetke álemniń túkpir-túkpirinen on myńdaǵan qajy keldi. Pontıfık óziniń quttyqtaýynda jahandyq qoǵamdastyqty soǵystar men áleýmettik ádiletsizdikten zardap shekken «álemniń jaralaryn» emdeýge shaqyrdy. Rım-katolık shirkeýi basshysynyń úndeýiniń negizgi taqyryby jahandyq syn-qaterler aldyndaǵy adam ómiriniń náziktigi boldy.
– Biz ólimniń bolýyn ádiletsizdikten, partııalyq ózimshildikten, kedeılerdi qysymǵa alýdan jáne eń osal adamdarǵa kóńil bólmeýden kóremiz. Biz ony zorlyq-zombylyqtan, dúnıeniń jaralarynan, álsizderdi janshyp jatqan qııanattardyń saldarynan barlyq jerde jańǵyrǵan azaptyń zarynan kóremiz, - dedi Rım Papasy Lev XIV.
Pontıfık jer baılyǵyn talan-tarajǵa salýǵa ákeletin «paıda putqa tabynýshylyqty» alǵa tartyp, qazirgi ekonomıkalyq jáne saıası úlgilerdi qatań synǵa alyp, soǵystyń joıqyn kúshin atap kórsetti.
Qorqynyshty jaǵdaıǵa qaramastan, Vatıkan basshysy dindarlardy úmitin úzbeýge shaqyrdy. Ol tipti eń qarańǵy ýaqytta da «Iemiz bizben birge bolyp», adamzattyń qaıǵy-qasiretiniń qarańǵylyǵynda «qaıta tirilýdiń sańylaýlaryn» ashatynyn atap ótti.
Lıtýrgııadan keıin Rım Papasynyń dástúrli úndeýi «Urbi et Orbi» («Qalaǵa jáne álemge») kútilýde, onda pontıfık dástúrli túrde beıbit dıalog pen gýmanızmge shaqyratyn eń ótkir halyqaralyq qaqtyǵystar aımaqtaryn tizimdeıdi.
Buǵan deıin Rım Papasy Lev XIV Monako knıazdigine alǵash ret 1538 jyldan keıin saparmen barǵanyn habarlaǵanbyz.
