Rım Papasy Lev XIV Parıjde 700 myń adam qatysqan messa ótkizdi
ASTANA. KAZINFORM — Rım Papasy Lev XIV Frantsııaǵa apostoldyq saparynyń ekinshi kúnin Parıjdegi Maison Bakhita ortalyǵynda mıgranttarmen kezdesýden bastady. Keıin ol Kelisim alańy men Elıseı alańdarynda 700 myń qajy qatysqan saltanatty messaǵa tóraǵalyq etti, dep habarlaıdy Kazinform agenttiginiń Eýropalyq odaqtaǵy menshikti tilshisi.
Senbi kúni tańerteń pontıfık Parıjdiń XVIII aýdanyndaǵy áleýmettik qoldaý jáne ıntegratsııa jónindegi eparhııalyq Maison Bakhita ortalyǵyna bardy. Ortalyq áýlıe Jozefına Bahıtanyń qurmetine atalǵan jáne burynǵy pontıfık Frantsısktiń mıgranttardy «qabyldaý, qorǵaý, qoldaý jáne ıntegratsııalaý» týraly úndeýine jaýap retinde qurylǵan.
Lev XIV Maison Bakhita, «Aux Captifs, la Libération» jáne «À Bras Ouverts» uıymdary ókilderiniń áńgimelerin tyńdap, osaldyq taqyrybynda sóz sóıledi. Kezdesý shaǵyn formatta ótip, shamamen jarty saǵatqa sozyldy.
Tústen keıin Katolık shirkeýiniń basshysy Kelisim alańynda saltanatty messaǵa tóraǵalyq etti. Qatysýǵa tirkelgen adamdardyń kóp bolýyna baılanysty is-sharanyń aýmaǵy Juldyz alańyna jáne Grand-Arme dańǵylyna deıin keńeıtildi. Dindarlar uzyndyǵy shamamen úsh shaqyrym bolatyn birtutas os boıyna ornalasty.
Bul – Vatıkan basshysynyń 2008 jyldan beri Frantsııaǵa jasaǵan alǵashqy resmı sapary. Lev XIV-niń sapary 25-28 qyrkúıek aralyǵynda ótip, Parıj, Lýrd jáne Mets qalalaryn qamtıdy. Messadan keıin pontıfık Lýrdqa ushady.
Buǵan deıin, juma kúni Rım Papasy Frantsııa Prezıdenti Emmanıýel Makronmen kezdesti, ıÝNESKO shtab-páterine bardy, Notr-Dam soborynda keshki qulshylyq rásimin ótkizdi jáne «Stad de Frans» stadıonynda jastarmen birge duǵa etý rásimine qatysty.
