Rım Papasy Lev XIV Madrıdten Barselonaǵa ushý kezinde ushqyshtar kabınasynda boldy
ASTANA. KAZINFORM – Rım Papasy Lev XIV Ispanııaǵa jasaǵan apostoldyq saparynyń ekinshi kúni Madrıdten Barselonaǵa ushý barysynda jolaýshylar ushaǵy ekıpajynyń kabınasynda biraz ýaqyt ótkizdi, dep habarlaıdy Kazinform agenttiginiń menshikti tilshisi.
Áýe kemesiniń kapıtany Pablo Martınes Nýnestiń shaqyrýymen Rım Papasy Iberia áýe kompanııasynyń Airbus A320 ushaǵyndaǵy ushqyshtar kabınasyna kirip, reıstiń edáýir bóligin sonda ótkizgen.
Ushý barysynda pontıfık ekıpaj múshelerimen áńgimelesip, ushaqty alyp júrgen Ispanııa áskerı-áýe kúshteri joıǵysh ushaqtarynyń ushqyshtarymen radıobaılanysqa shyqqan.
Rım Papasy áskerı ushqyshtardy jyly qarsy alyp, ıllıýmınator arqyly qol bulǵap amandasty.
– Bul óte jyly ári adamı sát boldy. Rım Papasy ushqyshtardyń jumysyna erekshe qyzyǵýshylyq tanytyp, olardyń qyzmetine alǵys bildirdi, – dep málimdedi Vatıkannyń baspasóz qyzmeti.
Lev XIV-tiń Ispanııaǵa sapary 2026 jylǵy 6-12 maýsym aralyǵynda ótip jatyr. Baǵdarlamaǵa Madrıd, Barselona jáne Qanar araldaryna barý engizilgen.
Sapardyń negizgi taqyryptary – eýropalyq halyqtardyń birligi, jastardy qoldaý, kóshi-qon máseleleri jáne konfessııaaralyq dıalog.
Ushqyshtar kabınasynda túsirilgen foto jáne beınematerıaldar álemdik buqaralyq aqparat quraldarynda keńinen taralyp jatyr.
Sheteldik basylymdardyń jazýynsha, Lev XIV ashyq ári zamanaýı qarym-qatynas stılimen erekshelenedi. Ol din ustanýshylarmen jáne qarapaıym adamdarmen beıresmı formattaǵy kezdesýlerdi jıi tańdaıdy.
Aıta keteıik, buǵan deıin AQSh Memlekettik hatshysy Marko Rýbıonyń Rım Papasymen kezdeskeni habarlanǵan bolatyn.
