Rım Papasy Leo XIV EO-ny kóshi-qonǵa qatysty izgi saıasat ustanýǵa shaqyrdy
ASTANA. KAZINFORM – Rım Papasy Leo XIV Jerorta teńizinde qaza tapqan mıgranttardy eske alý úshin Lampedýza aralyna baryp, Eýropalyq odaqty kóshi-qon máselesine uzaq merzimdi ári izgilikke negizdelgen saıasat ustanýǵa shaqyrdy, dep habarlaıdy DW.
Pontıfık 4 shilde, senbi kúni Eýropanyń eń ońtústigindegi aralǵa saparyn Jerorta teńizinde qaza tapqan mıgranttardyń qabirine gúl qoıýdan bastady. Ol únsiz duǵa oqyp, qaza tapqandardy eske aldy.
Aýmaǵy shamamen 20 sharshy shaqyrym bolatyn Lampedýza aralynda jergilikti turǵyndarmen qatar teńizde qaza tapqan bosqyndar da jerlenedi. Olardyń kópshiliginiń jeke basy anyqtalmaǵan. Zırat aýmaǵy únemi keńeıtilip keledi.
Leo XIV Eýropalyq odaqty mıgranttarǵa qatysty uzaq merzimdi ári gýmanıstik ustanym qalyptastyrýǵa shaqyrdy. Onyń aıtýynsha, Eýropa óziniń geografııalyq ornalasýy men ınstıtýtsıonaldyq múmkindikteriniń arqasynda kóshi-qon daǵdarysyn keshendi túrde sheshe alady.
Pontıfık EO-ny shuǵyl gýmanıtarlyq kómekti qabyldaý, qorǵaý, qoldaý jáne mıgranttardy qoǵamǵa beıimdeý sharalaryn qamtıtyn uzaq merzimdi strategııaǵa engizýge úndedi. Sonymen qatar mundaı saıasat adamdardyń týǵan jerin tastap ketýge májbúr bolýyna jol bermeıtin damý tetikterimen qatar júrýi tıis ekenin aıtty.
Onyń sózinshe, bul jumystardyń barlyǵy ár adamnyń qadir-qasıetin saqtaı otyryp júzege asyrylýy qajet. Bul jaýapkershilik tek memlekettik organdarǵa ǵana emes, azamattyq qoǵam men shirkeýge de júkteledi.
Týnıstiń jaǵalaýynan shamamen 140 shaqyrym jerde ornalasqan Lampedýza araly 2013 jyly bolǵan qaıǵyly keme apatynan keıin Eýropada mıgranttar daǵdarysynyń sımvolyna aınaldy. Sol kezde Italııa jaǵalaýynda 368 mıgrant sýǵa ketken. Sodan beri Jerorta teńizi baǵytymen Eýropaǵa jetýge talpynǵan taǵy myńdaǵan adam qaza tapty.
Halyqaralyq kóshi-qon uıymynyń Missing Migrants jobasynyń deregine sáıkes, 2014 jyldan beri Jerorta teńizinde jalpy sany 35 070 adam qaza tapqan nemese habar-osharsyz ketken.
Leo XIV ózinen burynǵy Rım Papasy Frantsısk bastaǵan dástúrdi jalǵastyrdy. Frantsısk 2013 jyly Lampedýzaǵa baryp, mıgranttardyń qaýipti taǵdyryna álem nazaryn aýdarǵan edi. Leo XIV te aralda qaıyqpen kelgen bosqyndarmen kezdesip, Frantsıskke arnalǵan «Papa Frantsısk aılaǵy – kelý, úmit jáne adamgershilik mekeni» atty eskertkish belgige taǵzym etti.
Odan keıin pontıfık ashyq aspan astynda messa ótkizip, Rımge oraldy.
Aıta keteıik, Prezıdentter kortejin bastap júretin polıtseılerge rıza bolǵan Rım papasy olarǵa Astanadan keterinde medal taqqan.
