Rım Papasy qaıtys boldy

ASTANA. KAZINFORM —  Rım Papasy Frantsısk 89 jasqa qaraǵan shaǵynda kóz jumdy, dep habarlaıdy TASS.

VaticanNews málimetinshe, Rım papasy 2025 jylǵy 21 sáýirde, dúısenbi kúni Vatıkandaǵy Kasa-Santa-Marta rezıdentsııasynda dúnıeden ozǵan.

Saǵat 9:45-te Apostoldyq palatanyń kamerlengosy kardınal Kevın Farrell Santa-Marta úıinen Rım Papasy Frantsısktiń qaıtys bolǵany týraly habarlady.

— Qymbatty baýyrlar, men Rım Papasy Frantsısktiń qaıtys bolǵany týraly qaıǵyly habardy jetkizýge májbúrmin. Búgin tańǵy saǵat 7:35-te Rımniń epıskopy Frantsısk ómirden ótti. Ol ǵumyryn qudaıǵa jáne onyń shirkeýine qyzmet etýge arnady, — delingen Vatıkan habarlamasynda.

Pope Francis died on Easter Monday, April 21, 2025, at the age of 88 at his residence in the Vatican's Casa Santa Marta. pic.twitter.com/jUIkbplVi2

— Vatican News (@VaticanNews) April 21, 2025

Pontıfık Frantsısk 1936 jyly 17 jeltoqsanda Argentınada dúnıege kelgen. 2013 jylǵy 13 naýryzda Rım papasy atandy. Saılanǵanǵa deıin 1998—2013 jyldary Argentınanyń prımasy jáne Býenos-Aırestiń arhıepıskopy boldy.

Keshe ǵana Pasha jeksenbisinde Papa Frantsısk dástúrli batasyn berý úshin Vatıkandaǵy Áýlıe Petr alańyna jınalǵan senýshilerdiń aldyna shyqqany habarlanǵan edi.

Osyǵan deıin Rım Papasy Redjına Koelı túrmesine barǵany belgili boldy.

Eske sala keteıik, 14 aqpanda Papa Frantsısk aýyr bronhıtke baılanysty Rımdegi Djemellı aýrýhanasyna jatqyzylǵan bolatyn. Ol 23 naýryzda 38 kúndik emnen keıin ekijaqty pnevmonııa dıagnozymen aýrýhanadan shyqty.

Jas kezinde pontıfıktiń ókpesiniń bir bóligin alyp tastaǵan jáne ómir boıy tynys alý problemasynan zardap shegip keldi.

Sońǵy ýaqytta Rım papasy em qabyldap júrgeni jáne tek mańyzdy sharalarda ǵana qysqa ýaqytqa kópshilik aldyna shyǵyp júrgeni aıtyldy.