Rım Papasy: Gaza sektoryndaǵy jaǵdaı barǵan saıyn kúrdelenip barady
VATIKAN. KAZINFORM – Rım-katolık shirkeýiniń jańa basshysy Papa Lev XIV Gaza sektoryndaǵy gýmanıtarlyq ahýalǵa alańdaýshylyq bildirip, áskerı áreketterdi toqtatyp, aımaqqa shuǵyl túrde gýmanıtarlyq kómekti kirgizý qajettigin atap ótti, dep jazdy Anadoly agenttigi.
Rım-katolık shirkeýiniń basshysy eksklavqa gýmanıtarlyq kómekti dereý jetkizýdi qamtamasyz etýge shaqyrdy.
8 mamyr kúni Konklav sheshimimen saılanǵannan keıin alǵash ret jalpy qabyldaý barysynda sóılegen Papa Lev XIV Áýlıe Petr alańynda jınalǵan jurtshylyqqa úndeý jasady.
– Gaza sektoryndaǵy jaǵdaı barǵan saıyn alańdatarlyq ári jan aýyrtatyn sıpatqa ıe bolyp barady. Men taǵy da shynaıy úndeý joldap, gýmanıtarlyq kómektiń esh kedergisiz jetýin jáne áskerı qaqtyǵystardyń toqtatylýyn suraımyn. Sebebi bul adam shoshyrlyq qasirettiń salmaǵyn eń aldymen balalar, qarttar men naýqastar kóterip otyr, – dedi pontıfık.
Papa Lev XIV sondaı-aq barsha dindarlardy kún saıyn beıbitshilik úshin jáne «júrekterdiń qarýdan arylýy» úshin duǵa etýge shaqyrdy.
Gaza sektoryndaǵy ahýal
18 naýryz kúni Izraıl armııasy 19 qańtarda engizilgen atysty toqtatý merzimi aıaqtalǵan soń, Gazadaǵy shabýyldaryn qaıta kúsheıtti.
Sol ýaqyttan beri 3 427 palestınalyq qaza tapty, olardyń basym bóligi — qarttar, áıelder jáne balalar. Taǵy 9 647 adam jaraqat aldy.
2023 jylǵy 7 qazanda bastalǵan jappaı shabýyldardan beri qaza tapqandardyń jalpy sany 53 573 adamǵa, al jaralanǵandar sany 121 688 adamǵa jetti.
Izraıl armııasy Gazada okkýpatsııany keńeıtip, bekitýge baǵyttalǵan shabýyl josparyn iske asyra bastady. Premer-mınıstr Bınıamın Netanıahý eksklavtyń tolyqtaı okkýpatsııalanatynyn málimdedi.
Osy josparǵa sáıkes, Izraıl áskerleri Gazada turaqty baqylaý ornatyp, palestınalyqtardy eksklavtyń ońtústigindegi arnaıy «kontsentratsııalyq lagerlerge» májbúrli túrde kóshirýdi kózdep otyr. Bul lagerlerde tek kún kórýge jeterlik eń az gýmanıtarlyq kómek kórsetilmek.
Izraıl mınıstrleri Gaza sektorynda aman qalǵan barlyq ınfraqurylymdy joıý jáne palestınalyqtardy — aldymen ońtústikke, keıin eksklav sheginen tys elderge kúshtep kóshirý nıeti baryn málimdedi.
Izraıl úkimeti ashtyqtyń aldyn alý maqsatynda Gazadaǵy azyq-túlik ımportyna shekteýli ruqsat bergenin habarlady. Degenmen, ýltraońshyl kúshterdiń qarsylyǵyna qaramastan, dúısenbi kúni eksklavqa tek bes júk kóligimen ǵana gýmanıtarlyq azyq jetkizildi.