Álem katolıkteri Rım Papasy Frantsısk úshin duǵa etip jatyr

ASTANA. KAZINFORM – Vatıkannyń habarlaýynsha, pontıfık 8 kúnnen beri aýyr respıratorlyq ınfektsııa dıagnozymen Rım aýrýhanasynda jatyr, dep habarlaıdy Euronews. 

Vatıkan 18 aqpanda pontıfıkke tynys joldarynyń polımıkrobtyq ınfektsııasy dıagnozy qoıylǵan soń ol emdeýdiń jańa kýrsyn alyp, aýrýhanada taǵy jatýy tıis ekenin habarlaǵan. Al kelesi kúni Rım Papasy Frantsıskke eki jaqty pnevmonııa dıagnozy qoıyldy. 

Pontıfık 14 aqpanda Rımdegi aýrýhanaǵa jatqyzyldy. Frantsısktiń dárilik terapııasy eki ret túzetildi.

— Tún jaqsy ótti, búgin tańerteń Papa Frantsısk turyp, tańǵy as ishti, — delingen Vatınkannyń sońǵy málimdemesinde.

Bir kún buryn pontıfıktiń klınıkalyq jaǵdaıy jaqsaryp, qyzýy qalypqa kelgeni habarlanǵan.

Frantsısk 88 jasta. Bala kezinde onyń ókpesiniń bir bóligi alynyp tastaldy, bul ony ómir boıy ótkir respıratorlyq ınfektsııalarǵa osal qaraıtyn etti.

Ierýsalımniń Latyn Patrıarhy kardınal Perbattısta Pıtstsaballa katolıkterdi «senimdegi bir otbasy bolyp» jınalyp, Rım Papasynyń «densaýlyǵy men amandyǵy» úshin birge duǵa etýge shaqyrdy.

— Biz messa kezinde de, úılerimizde de, júregimizdiń tynyshtyǵynda da jalyndy duǵalarymyzdy aıtamyz, Qudaıdan Rım Papasy Frantsıskke danalyqpen, kishipeıildilikpen jáne súıispenshilikpen shirkeýdi basqarý jónindegi qasıetti mıssııasyn jalǵastyra alatyndaı densaýlyq pen kúsh-qýat berýin suraımyz, — dedi Pıtstsaballa.

Pontıfık densaýlyǵyna baılanysty otstavkaǵa ketý týraly sheshim qabyldaýy múmkin degen boljam bar.

Eske sala ketsek, 2024 jyldyń kókteminde Rım Papasy Qazaqstanda sý tasqynynan zardap shekkender úshin duǵa etýge shaqyrdy. 

2024 jyldyń 19 qańtarynda memleket basshysy Rım Papasynyń shaqyrýymen Qasıetti Taqqa alǵashqy resmı saparyn jasady.