Rım Papasy Frantsısk Rojdestvo qarsańynda barlyq qarýly qaqtyǵystardy toqtatýǵa úndedi
ASTANA.KAZINFORM — Rım Papasy Frantsısk jeksenbilik duǵasynda Ýkraına men Gaza sektoryndaǵy mektepter men aýrýhanalardy aıaýsyz bombalaýdy aıyptap, barlyq soǵystardaǵy atysty toqtatýǵa shaqyrdy. Bul týraly Golos Amerıkı habarlady.
— Qarý úni joıylyp, Rojdestvo ánderi bastalsyn! Rojdestvo kúni Ýkraınada, Kıeli Jerde, Taıaý Shyǵysta jáne búkil álemde soǵys toqtasyn dep duǵa eteıik, — dedi Frantsısk jeksenbi kúni pontıfık.
Frantsısk «mektepteri, aýrýhanalary men shirkeýleri aıaýsyz qıratylyp, ábden tozǵan Ýkraınany» eske aldy.
Sondaı-aq ol Gaza týraly oılaǵan kezde qandaı aýyrtpalyq sezinetinin bildirdi.
Balalardy avtomatpen atyp, mektepter men aýrýhanalardy bombalaý — qandaı qatigezdik, — dedi ol.
Jeksenbilik duǵa jasaý rásimi ǵımarat ishinde ótti. Vatıkan muny syrttaǵy salqyn aýa raıymen jáne Frantsısk úshin aldaǵy aptanyń tyǵyzdyǵymen baılanystyrdy.
Seısenbi kúni 88 jastaǵy pontıfık ózi Qasıetti jyl dep jarııalaǵan jyldyń bastalýyna arnalǵan is-sharalarǵa, sondaı-aq Áýlıe Petr soboryndaǵy Rojdestvo kúnine arnalǵan sharalarǵa qatysady. Beısenbi kúni ol qasıetti jyldy ashyp brý úshin Rımniń bas túrmesine barady.
Frantsısk ásirese qys aılarynda bronhıt saldarynan japa shegedi. 2023 jyly ol aýrýhanaǵa túsip, em qabyldaǵan. Jas kezinde onyń ókpesiniń bir bóligin alyp tastaǵan, sol sebepti ásirese jaıaý júrgende nemese sharshaǵan kezde jıi entigip qalady.