Rım Papasy demokratııanyń «kópshiliktiń tıranııasyna» aınalý qaýpin synǵa aldy
ASTANA. KAZINFORM – Rım Papasy Lev XIV ózine qatysty Donald Tramptyń qatań málimdemelerinen eki kún ótken soń Vatıkandaǵy jıynǵa qatysýshylarǵa arnaıy úndeý joldady, dep habarlaıdy DW.
Úndeýde pontıfık saıası júıelerdiń turaqtylyǵy berik moraldyq negiz bolǵan jaǵdaıda ǵana saqtalatynyn atap ótti. Áıtpese, onyń pikirinshe, demokratııa «kópshiliktiń tıranııasyna» aınalýy nemese ekonomıkalyq jáne tehnologııalyq elıtalardyń ústemdigin búrkemeleýshi quralǵa aınalýy múmkin.
Pontıfık bıliktiń zańdylyǵy qoldaǵy resýrstardyń kólemimen emes, onyń qalaı júzege asyrylatynymen aıqyndalatynyn málimdedi.
– Bıliktiń zańdylyǵy ony júzege asyratyn tulǵalardyń danalyǵy men izgiligine baılanysty, – delingen úndeý mátininde.
Rım Papasy ekonomıkalyq nemese tehnologııalyq qýatty jınaqtaý ózdiginen basqarý quqyǵyn bermeıtinin erekshe atap ótti.
Óz joldaýynda pontıfık álem kóshbasshylaryn bılikti shamadan tys shoǵyrlandyrýdan saq bolýǵa shaqyrdy. Onyń aıtýynsha, ustamdylyq pen tejemelik tetikter bılikti asyra paıdalanýdyń aldyn alýda mańyzdy ról atqarady.
Qujat pontıfıktiń Afrıka elderine jasaǵan on kúndik sapary kezinde jarııalandy. Mátinde naqty memleketter tikeleı atalmaǵanymen, buǵan deıin Rım Papasy AQSh pen Izraıldiń Iranǵa qarsy áskerı áreketterin synǵa alǵan edi. Bul málimdemeler AQSh prezıdenti Donald Tramptyń narazylyǵyn týǵyzdy.
Eske sala ketsek, jýyrda Donald Tramp Rım Papasy Lev XIV-ti synǵa aldy.
Al Rım Papasy Pasha messasynda álemdegi ádiletsizdik pen soǵysqa nazar aýdardy.
