Rım papasy alǵashqy jeksenbilik ýaǵyzyn beıbitshilikke arnady

VATIKAN. KAZINFORM — Pontıfık Ýkraınada, Taıaý Shyǵysta jáne Úndistan men Pákistan arasyndaǵy jaǵdaıdy retteýge shaqyrdy, dep jazdy TASS agenttigi.

Rım Papasy Lev XIV óziniń alǵashqy jeksenbilik ýaǵyzyn beıbitshilikke arnap, Ekinshi dúnıejúzilik soǵystyń aıaqtalǵanyna 80 jyl tolǵanyn eske saldy jáne Ýkraınada, Taıaý Shyǵysta, sondaı-aq Úndistan men Pákistan arasyndaǵy qaqtyǵysty retteýge shaqyrdy.

— Ekinshi dúnıejúzilik soǵystyń qaıǵyly kezeńi 80 jyl buryn aıaqtaldy. Ol 60 mıllıon adamnyń ómirin qıdy. Qazirgi tańdaǵy úzik-úzik úshinshi dúnıejúzilik soǵys jaǵdaıynda, burynǵy Papa Frantsısktiń sózimen aıtqanda, men álem kóshbasshylaryn soǵysty toqtatýǵa shaqyramyn, — dedi 8 mamyrda saılanǵan pontıfık.

«Ýkraınada ádil ári berik beıbitshiliktiń múmkindiginshe tez ornaýy úshin barlyq qajetti áreketter jasalsyn», — dep atap ótti Lev XIV. Ol óz úndeýinde «beıbitshilik» sózin 10 ret qaıtalady. Baqylaýshylardyń paıymynsha, tuńǵysh amerıkalyq Papanyń pontıfıkaty beıbitshilik pen áleýmettik ádilettilik máselelerine basymdyq beredi.

Dúısenbi kúni pontıfık Vatıkandaǵy sońǵy oqıǵalardy — Papa Frantsısktiń jerleý rásimi men konklavty — jarııalaǵan jýrnalıstermen alǵashqy kezdesýin ótkizedi. Bul dástúrdi onyń aldynda bolǵan Papa bastaǵan. Vatıkan baspasóz qyzmetiniń málimetinshe, 90 elden shamamen 7 myń jýrnalıst akkredıtatsııa alǵan.

— Gaza sektoryndaǵy jaǵdaı meni qattty alańdatady. Halyqqa gýmanıtarlyq kómek kórsetilip, barlyq tutqyndar bosatylýy tıis. Men Úndistan men Pákistan arasyndaǵy atysty toqtatý týraly jańalyqty qýana qabyldadym. Aldaǵy kelissózder nátıjesinde tatýlasý jóninde kelisim jasalady dep úmittenemin, — dedi ol «Aspan Patshaıymy» duǵasynan keıingi úndeýinde.

Jańa pontıfık qasıetti Petr alańyna jınalǵan 100 myńǵa jýyq adamǵa arnaǵan sózinde tek Frantsısk týraly ǵana emes, Ioann Pavel II týraly da eske salyp, onyń áıgili «Qoryqpańdar!» degen sózin qaıtalady.

Eske sala keteıik, Robert Prevo jańa Rım Papasy bolyp saılandy.