Rım Papasy: Álem úshin beıbitshiliktiń qanshalyqty mańyzdy ekenin kórsetýdi qalaımyz
ASTANA. KAZINFORM — Rım-katolık shirkeýiniń basshysy Rım Papasy Lev XIV resmı saparmen Túrkııaǵa bardy, dep habarlaıdy Anadoly.
ITA ıtalıandyq áýe kompanııasy usynǵan arnaıy ushaqpen Túrkııaǵa barǵan Papa Lev XIV-ti 70-ten astam jýrnalıst qarsy aldy.
Ankaradaǵy Prezıdenttik keshende joǵary mártebeli qonaqty resmı túrde qarsy alý rásimi ótti.
Túrkııa prezıdenti Rejep Taııp Erdoǵan men Rım Papasy Lev XIV arasyndaǵy ekijaqty kezdesý ótti. Kezdesý prezıdenttik keshende ótti jáne shamamen jarty saǵatqa sozyldy.
Rım Papasy Lev XIV Túrkııaǵa saparyn asyǵa kútkenin aıtty.
— Men bul sapardy júzege asyra alǵanyma óte qýanyshtymyn, ony barlyq hrıstıandar men búkil álem úshin mańyzdylyǵyna baılanysty asyǵa kútken edim, — dedi ol.
Papa Lev XIV Túrkııa men Lıvanda ótkizetin kezdesýlerine toqtala otyryp, álemdegi beıbitshiliktiń mańyzyn taǵy da atap ótti.
— Biz álem úshin beıbitshiliktiń qanshalyqty mańyzdy ekenin atap kórsetýdi qalaımyz, — dep qosty ol.
Vatıkan basshysy barlyq adamdardy beıbitshilik jolynda birigýge jáne ony qamtamasyz etý joldaryn izdeýge shaqyrdy.
— Biz aramyzdaǵy aıyrmashylyqtarǵa, ártúrli dinder men senimderge qaramastan, bárimiz baýyrmyz jáne biz álemde beıbitshilik pen birlikti nasıhattaý protsesine óz úlesimizdi qosa alamyz dep úmittenemin, — dedi Lev XIV.
Kelissózderden keıin Rım Papasy Lev XIV «Djıhannýma» zalynda, Túrkııa Prezıdenttik ulttyq kitaphanasynda sóz sóıledi.
Onyń pikirinshe, búgingi kúni dıalog ornatyp, ony tabandylyq pen tózimdilikpen júrgize alatyn adamdar burynǵydan da mańyzdy.
— Eki dúnıejúzilik soǵystan keıin biz álemdegi joǵary shıelenis kezeńiniń kýásimiz. Bul jaǵdaı ekonomıkalyq jáne áskerı kúsh strategııalary arqyly kúsheıip otyr, — dedi ol.
Papa Lev XIV basym ekonomıkalyq jáne áskerı kúshterdiń strategııalary bul shıelenisti kúsheıtetinin aıtty. Onyń sózinshe, bul jaǵdaı Papa Frantsısk atap ótkendeı, «baıaý bastalyp kele jatqan úshinshi dúnıejúzilik soǵysqa» ákelýi múmkin.
— Biz oǵan eshqashan boı bermeýimiz kerek. Adamzattyń bolashaǵyna qaýip-qater tónip tur. Bul shıeleniske jumsalatyn energııa men resýrstar adamzattyń búgingi basty máselelerinen — beıbitshilik ornatý, ashtyq pen kedeılikpen kúres, densaýlyq saqtaý, bilim berý jáne tabıǵatty qorǵaýdan — alastatady, — dedi Rım papasy.
Lev XIV sózin halyqaralyq yntymaqtastyqqa shaqyrýmen aıaqtady. Ol Vatıkan adamnyń jan-jaqty damýyna umtylatyn memlekettermen birge jumys isteýge daıyn ekenin aıtty.
— Sondyqtan, Jaratýshynyń qoldaýyna senip, shyndyq pen dostyq jolymen birge júreıik, — dep túıindedi ol.
Budan buryn Rım-katolık shirkeýiniń basshysy Rım Papasy Lev XIV alǵashqy sheteldik saparyn Túrkııadan bastaýdy josparlap otyrǵanyn jazǵan edik.