Rım masters týrnıri: Aleksandr Býblık qarsylasyn bet qaratpaı utty
ASTANA. KAZINFORM — Qazaqstannyń birinshi, álemniń 11-raketkasy Aleksandr Býblık Rım (Italııa) ATP 1000 týrnıriniń úshinshi aınalymyna shyqty.
Jarystyń 9-raketkasy bolyp tirkelip, ekinshi aınalymnan bastaǵan qazaqstandyq tennısshi reıtıngide 65-satydaǵy argentınalyq Sebastıan Baespen sheberlik baıqasty. Osyǵan deıin qarsylastar bir-aq ret kezdesip, onda qazaqstandyq sportshy basym túsken edi.
Bul joly birinshi partııada Býblık bet qaratpady – 6:1. Ekinshi sette de 4:0 esebimen alǵa ketti. Aqyry matchty jeńispen túıindedi – 6:2.
Nebári 59 mınýtqa sozylǵan básekede Býblık 4 eıspen birge 9 breık-poınttyń tórteýin óz esebine jazdy. Baes 1 eıspen shekteldi.
Aleksandr Býblık tórtinshi aınalymǵa ótý úshin álemniń 21-raketkasy, amerıkalyq, 20 jastaǵy Lerner Tenmen talasady. Ol ekinshi aınalymda reıtıngide 87-oryndaǵy bosnııalyq Damır Djýmhýrdy aıqyn basymdylyqpen utty – 6:2, 6:1.
Taǵy bir qazaqstandyq, reıtıngide 85-oryndaǵy Aleksandr Shevchenko ekinshi aınalymda álemniń 15-raketkasy, reseılik Karen Hachanovqa jol berdi – 4:6, 4:6.
Eske sala keteıik, budan buryn Zańǵar Nurlanulynyń Germanııadaǵy týrnırdiń shırek fınalyna shyqqanyn jazǵan edik.
