Rım - Máskeý - Astana - Shanhaı avtosherýiniń qatysýshylary aldaǵy aptalarda Qazaqstanǵa keledi
ASTANA. Tamyzdyń 19-y. QazAqparat /Arman Asqarov/ - Rım - Máskeý - Astana - Shanhaı avtosherýiniń qatysýshylary aldaǵy aptalarda Qazaqstanǵa kelmek. Shanhaıda ótetin EKSPO-2010 avtokórmesine bet alǵan ıtalıandyq ónertapqyshtar búgin Reseıdiń Rostov oblysy arqyly ótti,
dep habarlaıdy QazAqparat.
Avtosherýge qatysyp jatqan Italııadaǵy Parma ýnıversıtetiniń ǵalym-qurastyrýshylary adam basqarmaıtyn avtomobıl oılap shyǵaryp, bul jańalyqtaryn Shanhaıda ótetin EKSPO-2010 avtokórmesinde tanystyrmaqshy. Kún sáýlesiniń qýatymen júretin shaǵyn mobılderdi tolyǵymen kompıýter basqarady. Ol máshınege ornatylǵan arnaıy beınekameralar jan-jaqtaǵy kedergi-tosqaýyldardy anyqtap, ońtaıly joldy tańdap otyrady. Avtomobılder saǵatyna 50 shaqyrym jyldamdyqpen júre alady.
Reseıdiń Rostov oblysynyń aýmaǵynan ótken avtosherýshiler Qazaqstanǵa deıin áli 10 myń shaqyrymdaı jol júredi. Italıandyq ónertapqyshtar Qazaqstanǵa 2-3 aptadan keıin keledi degen boljam bar. Bul, árıne, kún raıyna da tikeleı baılanysty.
