Rım qalasynyń mańynda Italııa áskerı-áýe kúshteriniń eki ushaǵy apatqa ushyrady
ASTANA. QazAqparat – Italııa áskerı-áýe kúshteriniń qos birdeı oqý-jattyǵý ushaǵy Rım qalasyna jaqyn mańaıda apatqa ushyrap, eki ushqysh qaza boldy, dep habarlaıdy QazAqparat tilshisi «RIA Novostı» agenttigine silteme jasap.
Oqıǵa Italııa astanasynan soltústik-shyǵysqa qaraı 20 shaqyrym jerde ornalasqan Gýıdonııa-Montechelo qalasynda bolǵan. Málim bolǵandaı, ıtalıandyq SIAI-Marchetti kompanııasy shyǵarǵan ushaqtardyń biri qurylysy júrip jatqan turǵyn úı aýmaǵynda turǵan kólikke qulaǵan. Jergilikti BAQ-tyń habarlaýynsha, ushqysh áýe kemesiniń úıge qulaýyna jol bermegen. Apat ornynan 100 metr qashyqtyqta balabaqsha ornalasqan.
Jarııalanǵan fotosýretterge sáıkes, ekinshi ushaq dalaly alqapta apatqa ushyraǵan.
Eki ushqysh ta oqıǵa ornynda kóz jumdy. Al oqý-jattyǵý sharalaryna qatysqan taǵy eki ushaq bazaǵa aman-esen oraldy. Oqıǵa ornynda qutqarýshylar men quqyq qorǵaý organdarynyń qyzmetkerleri jumys istep jatyr.
