Rım áýejaıynda koronavırýsqa baılanysty qaýipsizdik sharalary kúsheıtilip jatyr
RIM. QazAqparat – Italııa Densaýlyq saqtaý mınıstrligi osy aptada Rımdegi Fıýmıchına áýejaıynda Qytaıdyń Ýhan qalasynan keletin jolaýshylarǵa arnalǵan dene temperatýrasy skanerleri ornatylatynyn málimdedi, dep habarlaıdy QaAqparat ANSA-ǵa silteme jasap.
Agenttiktiń málimeti boıynsha, skanerler beısenbi kúni qoıylady. Dál osy kúni koronavırýs anyqtalǵan Ýhan qalasynan Italııa astanasyna reıs ushyp keledi.
Mınıstrliktiń aıtýynsha, Ýhan qalasynan kelgen jolaýshylar arnaıy densaýlyq dálizinen ótip, olardyń dene temperatýrasy skaner arqyly ólshenedi. Skanerler aldaǵy ýaqytta qytaılyq qaladan keletin barlyq reısterge paıdalanylady.
Sonymen qatar, jolaýshylar kelgennen keıingi saıahat marshrýtyn kórsetetin arnaıy úlgini toltyrady.
«Italııa jańa koronavırýsty (2019-nCoV) baqylap otyr jáne Halyqaralyq densaýlyq saqtaý uıymymen únemi baılanysta»,- delingen mınıstrliktiń málimdemesinde.
Buǵan deıin, koronavırýs Qytaı shekarasynan tys aýmaqtarǵa taralǵanyn jazǵan bolatynbyz. Taıland, Japonııa jáne Ońtústik Koreıada vırýs juqtyrǵan adamdar tirkeldi.
