Rım 2036 nemese 2040 jylǵy Olımpıadany ótkizýge ótinim bermek
ASTANA. KAZINFORM – Italııa astanasynyń meri Roberto Gýalterı Rımniń 2036 nemese 2040 jylǵy jazǵy Olımpıada oıyndaryn ótkizýge ótinim berýge daıyndalyp jatqanyn málimdedi. Bul týraly Kazinform agenttiginiń Eýropa odaǵyndaǵy menshikti tilshisi BTA agenttigine silteme jasap habarlaıdy.
Qala ákiminiń aıtýynsha, iri sporttyq jarystar ekonomıkanyń damýyna serpin berip, ınfraqurylymdy jańǵyrtýǵa jol ashady. Roberto Gýalterı Rımdegi jańa stadıondardyń qurylysyna da toqtaldy. Qazir «Roma» fýtbol klýbyna arnalǵan jańa arena salynyp jatyr. Al 2032 jylǵy Eýropa chempıonatyna daıyndyq aıasynda «Latsıo» klýbyna arnalǵan sport nysanynyń qurylysy qatar qolǵa alynǵan.
Ákimniń sózinshe, atalǵan jobalar Rımniń Olımpıada oıyndaryn ótkizý jónindegi ótinimin odan ári nyǵaıta túsedi.
Eske sala keteıik, Rımde Olımpıada oıyndary buǵan deıin 1960 jyly ótken. Al 2020 jáne 2024 jylǵy oıyndardy ótkizýge nıet bildirgenimen, eki talpynys ta júzege aspady. 2020 jylǵy jobaǵa úkimet qoldaý kórsetpese, 2024 jylǵy ótinimdi sol kezdegi Rım meri Vırdjınııa Radjı qaıtaryp alǵan.
Ázirge Halyqaralyq Olımpıada komıtetine resmı ótinim berilgen joq. Degenmen joba júzege asyrýǵa laıyq dep baǵalansa, Rım bıligi Italııa úkimeti jáne Ulttyq Olımpıada komıtetimen (CONI) birlesip jumys isteýge daıyn.
Italııalyq basylymdardyń málimetinshe, CONI Olımpıada oıyndaryn Rım men Neapolde qatar ótkizýdi qarastyryp jatyr. Jarystardyń bir bóligi Neapolde ótpek. Olımpıadany 2036 nemese 2040 jyly ótkizý týraly sheshim ázirge qabyldanǵan joq. Bul rette 2026 jylǵy Mılan men Kortınada ótetin qysqy Olımpıada oıyndarynan keıingi qarjylyq jaǵdaı da eskerilip otyr.
2036 jylǵy Olımpıada oıyndaryn ótkizýge Úndistan, Túrkııa, Chılı jáne Indonezııa qyzyǵýshylyq tanytyp otyr. Sondaı-aq Ońtústik Koreıa, Ońtústik Afrıka Respýblıkasy, Majarstan, Mysyr, Kanada, Saýd Arabııasy jáne Qatardan da ótinim túsýi múmkin.
Buǵan deıin Italııadaǵy 2026 jylǵy Olımpıada oıyndaryna jumsalǵan shyǵyn 5 mlrd dollardan asqany habarlanǵan bolatyn.
Aqzat Baqytjanqyzy
