Rıksos qonaq úıine toqtaǵan Rýmynııa fýtbolshylaryn tonap ketken
ASTANA. QazAqparat - 11 qazan kúni «Astana Arena» stadıonynda ÁCh-2018 irikteý týrynda Qazaqstan fýtbol quramasymen oınaǵan Rýmynııa fýtbolshylaryn belgisiz bireýler tonap ketti. Bul aqparatty «QazAqparat» tilshisine Astana qalalyq Іshki ister departamentiniń baspasóz qyzmeti rastady.
Baspasóz qyzmetiniń aqparatyna súıensek, 11 qazanda, saǵat 18.25-te «Rıksos» qonaq úıiniń ákimshi qyzmetkeri Astana qalasynyń polıtsııa pýltine habarlasyp, qonaqtardyń jeke zattary joǵalǵanyn habarlaǵan. Belgisiz jaǵdaıda alty rýmyndyq fýtbolshynyń planshetteri, aqshalary, uıaly telefondary urlanǵan eken.
Bir qyzyǵy, Rýmynııa sportshylary urlyq týraly aryz jazbaǵan.
«Fýtbolshylardan aryz túsken joq. Biraq, tonaý faktisi QR Qylmystyq kodeksiniń 188-baby («Urlyq») boıynsha sot aldy tergeýdiń biryńǵaı tizimine tirkeldi»,-dep habarlady ІІD baspasóz qyzmeti.
Rýmynııanyń buqaralyq aqparat quraldary habarlaǵandaı, Alın Toshka, Nıkolae Stanký, Stelıano Fılıp, Ovıdıý Hoban, Bogdan Stanký jáne Erık Bıkvalfıler zardap shegip otyr. Aldyn ala málimet boıynsha, urylar sportshylardyń jattyǵýǵa ketkenin kútken. Árbir fýtbolshydan 250 eýro, jáne rýmyn men qazaq valıýtalary joǵalǵan.
Keshe, 11 qazan kúni «Astana Arena» stadıonynda ÁCh-2018 irikteý týrynda Qazaqstan fýtbol quramasy Rýmynııaǵa qarsy oınady. Oıyn esebi - 0:0. Osylaısha Qazaqstan quramasy ekinshi upaıdy oljalady. Rýmynııa quramasy qazaqstandyqtardyń dóreki oıynyna narazylyq tanytyp, alań ıeleri tarapynan bolǵan ádepsizdikterdi elemegen tóreshilerge de birqatar syndar aıtqan edi.
